Nongpoh, Rymphang 24
Ki rawon lane ki nongkhwai doh ha ka wah Umran ha ka sngi Ba-ar ki la lap ïa ki shyieng briew kiba la sahkut ha ki khap maw ha kaba la suba jur ba ki dei ki shyieng jong uwei u rangbah uba la hap ha katei ka wah na ka jingkieng Iewsier phra bnai mynshwa bad khlem lap dien shuh.
Katkum ka tyllong khubor ba la ïoh lum, la ïathuh ba kitei ki rawon kiba dei na ka shnong Umtasor tang mar ïa ïohi ïa kitei ki shyieng, kila pyntip mar mar sha ki bahaïing jong utei u rangbah bad nongïalam shnong, kiba la pyntip pat sha ki pulit na ka bynta ban pynlong ïa ka jingtohkit bad ruh ban pynshisha la ki dei ne em jong utei u rangbah uba la jah phra bnai mynshwa.
Kumban shu kdew hangne, u (L) Bah Ebi Nongshli, na ka shnong Umtasor katba u dang shongkai bad la ki paralok hajrong ka jingkieng Iewsier ha ka janmiet jong ka 27 tarik u bnai Naitung 2025, u la kum hap kynsan bad shah rong ha katei ka wah kat haduh ba ym lap dien shuh wat haba na ka liang ki bahaïing hasem ryngkat ka shnong ka thaw, kila ïaleh ban wad ïa u.
Na ka liang ka lok jong utei u rangbah, kala suba jur ba lehse kitei ki shyieng ki lah ban dei jong u lok u jong ka namar ka jinglap ïa ki jaiñ phong, hynrei ym pat ban pynthikna pura bad ki la kyrpad ïa ki bor pulit ba kin leh ïa ka DNA test ban lap ïa ki jingshisha bad ban pynthikna la kitei ki shyieng ki dei ne em jong u Bah (L) Ebi Nongshli.
Halor kane ka bynta, na ka liang ki pulit ha ka jingdon ryngkat ki bahaïing hasem bad ki nongïalam shnong, ki la lum noh ïa ki shyieng na ka bynta ban pynlong ïa ka jingtohkit bad ruh ban pyndep ïa ki bynta katkum ki kyndon jong ka aiñ.
