Nongstoiñ, Rymphang 24
Hato ka jingitynnad jong ka dewlynnong Nong-khnum kaba long kawei na ki dewlynnong kaba la khring bha ïa kiba bun ki nongwan jngohkai pyrthei na kylleng ki Jylla kiba na rithor jong ka Ri bad wat na kiwei pat ki ri jong ka pyrthei kan shu lip noh?
Kane ka dei ka jingkylli kaba mih na kiba bun balang haba ki poi ban leit jngoh ïa katei ka jaka, ha kaba la ong ba ka jingitynnad jong katei ka jaka mynta ka la pynisaitmet pynban na-mar naduh ki lum jong ka dewlynnong Nongkhnum la bun satang ki bilor pait, ka wah ruh la shu leh tohmet da ki briew da kaba pynpait ïa ki bilor kyiad, bad ym tang katta ha ki katto katne ki bynta kiba itynnad la don kiba la leit shet ja ban bam khana bad ki la shu ieh lyngktar nadong shadong kaba la pyni jaboh shibun ïa ki jaka kiba don ha rudwah namar ki ñuit ki ñier kiba la shu phriang kylleng sawdong.
Lah ban kdew ba ïa kane ka dewlynnong la thaw bad pynlong da ka jingphiah jong ka Wah Kynshi, bad kumba ka paw bad ïohi mynta ka jingkhring jong katei ka jaka ka dei namar ka jingdon ka jingitynnad ha ka, kata naduh ka dewlynnong, ki beach, bad hapoh ka bynta jong kane ka dewlynnong ki don ruh bun tylli ki kshaid, kynthup ïa ka kshaid kaba la tip kum ka Kshaid Thup bad kiwei kiwei.
Shuh shuh katkum ka jinglap, nalor ka jingbret pathar ïa ki plastik, ki bilor pait, ka jingsniew jong ka surok ka ban poi sha katei ka dewlynnong ruh ka dei kawei ka mat kaba la ktah bha ïa ka ïaid ka ïeng jong ki paidbah katei ka thaiñ, kyrpang ïa ki nongwan jngohkai.
Na ka liang ka Kong Emilia Khongwar kaba wan jngohkai ïa katei ka jaka haba ïakren bad u nongthoh khubor ka la ong ba ka la poi khnang sha katei ka jaka ka long hadien ba ka ju ïoh sngew ba ka dei ka jaka kaba la bna nam bha ha ka Jylla bad wat shabar jong ka Jylla bad shabar Ri ruh kumjuh hynrei haba ka poi pat ha katei ka jaka ka la long pynban da khongpong namar la lap ba mar ïa sdang ban poi ha ki jaka kiba itynnad jan baroh kawei ki jaka la dap satang da ki ñuit ki ñier kum ki plastik ki jaboh jabaiñ ki bym lah shuh ban batai bad wat ka wah ruh ka dap da ki bilor pait hapoh um.
Shuh shuh ka la ong ba lada don kiba kwah ban leit ngam um pyngngad ha katei ka wah ruh ka buh jingma pynban namar lah ban shah ot ha ki bilor pait kiba dei ki bilor kyiad ba la pynpait dusmon da ki briew.
Na ka liang katei ka longkmie ka la tam ruh ïa ki katto katne tylli ki bilor na katei ka wah bad ka la thang noh ruh ïa ki katto katne ki jaboh kiba la bret pathar da ki briew ha katei ka jaka.
