Shillong, Rymphang 24
Ka Kong Ampareen Lyngdoh kaba dei ka MLA na East Shillong Constituency, kaba la dei ka kyrtong kaba shah rem ha ka ilekshon MP Lok Sabha ba dang shu dep ka la ong ba lada ka shah tyrwa tiket biang ha ka NPP ka hap ban shong pyrkhat bad ki nongkitkam jong ka Block bad ki bahaïing hasem.
Ka la ong haduh mynta ym pat don jingïakren ïakhana sha-phang ka tiket namar ka por ka dang kloi.
Haba ïakren shabar ka ïingdorbar, ka Kong Ampareen ka la ïathuh ba ban ïakhun ilekshon ki don shibun ki jingtynjuh hynrei lada don ka jingtyrwa ka hap ban ïakren ïa ki nongkyrshan bad ki bahaïing ruh.
Ka la ong biang ba ka ilekshon MP ba la dep ka ïoh por tang 2 bnai shiteng hynrei mynta ka jingpynkhreh ïa ka ilekshon MLA ha u 2028 ruh ka la jan bha dei na kane ka daw ba hap ban shim lang ïa ka jingmynjurlang.
Kane ka jingïakren bad ka Kong Ampareen ka dei hadien ba ka shuki MP Lok Sabha Shillong Constituency ka la thylli hadien ka jingkhlad u Dr. Ricky Syngkon uba jop na ka VPP.
