Shillong, Rymphang 24
Ka President jong ka Bharatiya Janata Party (BJP) State Mahila Morcha, Meghalaya, ka Kong Arena Hynñiewta ka la pynrem jur ïa ka jingjia ha Malviya Nagar Delhi, halor ka jingshah ñiew beiñ bad shah kren beiñ jong ki nongshong shnong na ka thaiñ Shatei Lam Mihngi.
Haba kren sha ki lad pathai khubor ha ka sngi Ba-ar jong ka taïew, ka Kong Hynñiewta ka la ong ba kum kine ki jingshah niew beiñ ïa ki briew na ka thaiñ Shatei Lam Mihngi ki ju jia na ka por sha ka por bad ka BJP Meghalaya ka pynrem jur ïa kane.
“Ngi kum ki nong India ngi don ka hok, man ka Jylla ka don ka hok ban shong ban sah ban trei ban ktah, ka jingjia ïa kito kiba na ka Jylla Arunachal Pradesh ka ktah shibun, namar ki la mad ïa ki jingshah kren beiñ,” ka la ong.
Ka la ong ruh ba ka khia mynsiem ban ïohi ïa kum kine ki jingjia, ka Sorkar ka dei ban peit ïa kum kine ki jingjia bad ban khanglad shi syndon, kam pher la ka dei na ka BJP hynrei kan mih shakhmat ban ïasaid na ka bynta ki paidbah jong ka thaiñ Shatei Lam Mihngi.
“Shen ngan sa phah da ka jingthoh sha ka National President BJP Mahila Morcha bad sha ki bor kiba dei peit ban ïakren ban ïa burom markylliang, watla ngi dei na kano-kano ka Jylla ruh ki dei ban ïatreilang,” la bynrap biang ka Kong Hynñiewta.
Da kaba dawa ruh ba ki bor ba dei peit ki dei ban pynshitom tyngeh ïa kito ki briew kiba kren tohmet ïa kitei samla na Arunachal Pradesh.
