Shillong, Rymphang 24
Ka Geeta Sarin, Vice President jong ka BJP State Mahila Morcha, ka la pynrem ïa u nongïalam ka Liang Pyrshah u Rahul Gandhi bad ïa ki nongkyrshan jong ka Congress halor ka jingleit tur jong ki sha ka India AI Impact Summit ha kine ki khyndiat sngi ba la dep.
Na ka liang ka Geeta Sarin ka la ong ba ki nongïalam ka seng Congress ki dei ban leh ha ka lynti kaba dei, kaei kaba u Rahul Gandhi u la leh kam long kaba dei bad lada ki don kiei-kiei ki mat ki dei ban ïakren bad pynbeit hapoh la ka jong ka ri, ha kaba baroh ki ri ka pyrthei ki peit sha ka India bad kan long kaba pynkhlemraiñ ïa ka ri hi baroh kawei.
Ka Mahila Morcha jong ka BJP Meghalaya ka pynrem jur ïa kaei kaba la jia, namar ka la pynhiar dor ïa ka ri da ka jingleh ka jong ki. Ka la kyntu ïa ki nongïalam jong ka Liang Pyrshah ban ym leh shuh ïa kum kine ki kam.
Ka Geeta Sarin ka la ong ba ka jinglaw ïa ki jaiñ ha ka summit kaba la ïa don bynta lang da ki nongïalam na kylleng ka pyrthei ka long kaba bakla bad ki dei ban ïakren hapoh. Da kaba ong ruh ba ki la dei ban wan sha khmat ban ïakren ïa ki jingïapher.
Shuh shuh ka ong ba kum ki nongïalam la ki dei kiba don ha ka Sorkar ne ha ka Liang Pyrshah ki dei ban ri ïa la ka burom ka akor jong ki.
