Shillong, Rymphang 24
Ka Nongmynsong CC ka la don ha ka thong jingïaknieh ban ïoh rung sha ka semi final na ka Group-A ha ka Super Division Cricket League 2026 ba la pynlong da ka Shillong Cricket Association (SCA), hadien ba ka pynliem noh ïa ka Langsning XI CC da 93 run ha ka sngi Ba-ar.
Ha kane ka jingïakhun kaba la long ha madan ïalehkai kriket jong ka MCA ha Polo, ka Nongmynsong ka la kam trai ba kan tied nyngkong ha kaba ka la kamai 220 run bad shah pynhap 7 wiket ha ki 45 over. Kane ka la wan lyngba ka jingïalehkai bha u Pushkar Raj Singh lem bad u Anish Charak, kiba la khyrwit ïa ki shiteng spah run.
U Pushkar u la tied 60 run na ki 83 bol bad u Anish u la ïoh 56 run na ki 53 bol. Katba u Ronnie Nongrum u la khur 3 wiket bad ïa ka 1 wiket la ïoh da u Prince Ray na ka bynta ka Langsning.
Haba wan beh ïa ka thong ki nongtied ka Langsning ki la shah pynkhyllem lut baroh bad kamai tang 127 run ha ki 35.4 over. U Enrick Suchiang u la tied 26 run na ki 28 bol bad u Aaron A Nongrum u la ïoh 23 run na ki 34 bol. Katba u Anish Charak u la khur 3 wiket bad ïa ki 2 wiket la ïoh da u Ram na ka bynta ka Nongmyn-song. Ïa ka nam Player of the Match la khur da u Anish Charak.
Lyngba kane ka jingjop, ka Nongmynsong ka la ïaryngkat mar 6 poiñ ryngkat ka Royal CC bad ka Sputnik CC na ka bynta ban don ha ka kyrdan ba nyngkong, ba-ar bad balai.
Ka jingïalehkai jong ka Group-B ha ka sngi Balang kan long hapdeng ka Sporting CC pyrshah ïa ka NFU naduh ka por 8:30 mynstep.
