Shillong, Rymphang 24
Ki pulit jong ka East Jaiñtia Hills kila ïoh kem ïa arngut ki nongkhaïi drok bad ïoh kurup ïa u heroin ba 204 gram ha ka jingtalasi kali ha Umkiang Out Post ha ka miet sngi U Blei.
Katkum ka jingpyntip u Superintendent of Police Pankaj Rasgania, ïa kine ki briew bad u drok la ïoh kurup na kane ka kali Alto K10 ba don u nombor AS11-R-1523.
U pyntip ïa kane ka kali la pynsangeh ha ka por 11:30 mynmiet ha ka jingtalasi kali bad na kane ka kali la ïoh kurup haduh khathynñiew tylli ki synduk sabon ba thep ïa u heroin.
Ki arngut ki briew kiba shah kem ki kyrteng u Suhal Admed ba 20 snem, uba dei na Tarapur, Kalain bad u Aktar Hussain, 37 snem uba dei na Kali Nagar, Shiv Narainpur, kiba hap hapoh Cachar District, Assam.
Ïa kine ki briew la pynngat hapoh ka kyndon NDPS act bad ka jingtohkit mynta kala ïaid shakhmat.
