Jowai, Rymphang 24
Ka ïingbishar jong ka Kong P. Syngkon, Special Judge (POCSO), kala rai pynrem ïa u Duh Timung da kaba pyngngat hapoh ka Section 5(m)(n) ka aiñ POCSO Act bad Section 506 ka IPC.
Kane ka mukotduma ka mih na ka FIR ba la ujor da kawei ka longkmie ha ka 22.09.2018, kaba kynnoh ba u Duh Timung ula bat bor ïa ka khun jong ka, kaba dang 11 snem haduh arsien bad la kynnoh ba u la byrngem ruh ba un pynmynsaw ïa ka, lada ka pynpaw ïa ki jingjia.
Nyngkong u Duh Timung u la phet rieh na ka jingshah kem, bad la kem noh ïa u ha ka 17.09.2019 bad la register mukotduma ha thanad Nartiang katkum ka Case No. 5(l)(m)(n) ka aiñ POCSO Act ryngkat ka Section 506 IPC. La tohkit bad Charge Sheet da ka WPSI I. Kharpran.
Hadien ba la kut ka jingbishar, ka Kashari jong ka Special Judge (POCSO), West Jaiñtia Hills kala hukum ban set phatok 10 snem ïa u Duh Timung ha ryngkat ka kuna kaba T.10,000 katkum ka aiñ POCSO.
La hukum ruh ban set phatok sa 2 snem ryngkat ka kuna kaba T.5,000 namar ki jingbyrngem katkum ka kyndon 506 IPC.
Ka jingpynshitom baroh ka long 12 snem ha phatok.
