Shillong, Rymphang 24
Ka spah run ba la kamai da u Harry Brook ka la biang pura ïa ka England ban pynliem noh ïa ka Pakistan da 2 wiket ha ka Super Eight jong ka T20 World Cup ha ka sngi Ba-ar ha Pallekele International Cricket Stadium kaba ha Sri Lanka.
Kane ka long ka jingjop kaba ar ïa ka England ha ka Super Eight bad kham hashwa ka la jop ïa ka Sri Lanka da 51 run. Te kumta ka England ka la long ka kynhun kaba nyngkong eh ban jam sha ka semi final ha kane ka lympung.
Watla ka Pakistan ka la buh ïa ka thong da 164 run, hynrei ka England ka la lah ban ïalehkai bha naduh kaba sdang. U kapten katei ka kynhun u Harry Brook u la lah ban pynpaw ïa ka jingtbit da kaba u la lah ban kamai 100 run na ki 51 bol kynthup ïa 10 tylli ki ‘four’ lem bad 4 tylli ki ‘six’. Ha kaba kut u Liam Dawson (not out) bad u Jofra Archer (not out) ki la lah ban pynurlong ïa ka jingjop da kaba kamai 166 run bad shah pynhap 8 wiket.
Kham hashwa ka Pakistan ka la kam trai ban tied nyngkong ha kaba ka kamai 164 run bad shah pynkhyllem 9 wiket ha ki 20 over. U Sahibzada Farhan uba la shimti ïa ka pali tied kaba nyngkong u la ïalehkai ha kaba u la khyrwit ïa ka shiteng spah kaba 63 run na ki 45 bol, kynthup ïa 7 tylli ki ‘four’ lem bad 2 tylli ki ‘six’. Kumjuh u Babar Azam bad u Fakhar Zaman, kiba la tied mar 25 run. Katba ki nongkawang bol ka England, kata u Liam Dawson u la khur 3 wiket, katba ïa ki 2 wiket la ïoh da u Jofra Archer bad u Jamie Overton.
