New Delhi, Rymphang:
Ka sorkar Delhi ha ka lah sngi U Blei, ka la pynbna ba kan pyntreikam ïa ka skhim ‘Rah-Veer’ jong ka sorkar pdeng ha ka nongbah, ka plan kaba ai khusnam ïa ki nongshong shnong kiba ïarap ïa ki briew ba mynsaw jur na ki jingjia aksiden ha ka por ba ki donkam eh ban ai ki jingïarap khnang ban lah ban pynim ïa ki da ka jinglah ban pynïoh ïa ki jingsumar ha ka por ba biang.
Ka Myntri Rangbah ka jylla ka Rekha Gupta ka la ong ba kane ka skhim ka long ban pynshlur ïa ki nongsakhi kiba don ha kino kino ki jaka ba jia kum kine ki jingjia ba kin kloi ban ai jingïarap ïa kiba mynsaw khlem kano kano ka jingsheptieng shaphang ki jingtreikam jong ki kyndon aiñ.
“Bun ki briew ki artatien ban ïarap namar ka jingtieng ïa ki jingeh ha ka liang ka aiñ ne ki rukom treikam jong ki pulit. Kane ka skhim kan weng ïa kum kine ki jingtieng bad kan pynshlur ïa ki nongshong shnong ban ïaid shakhmat,” ka la ong bad bynrap ba ka thong ka long ban pynthikna ba kiba mynsaw jur kin ïoh ïa ka jingsumar hapoh ka kynta kaba kordor ban pynim ïa ki.
Kino kino kiba ïarap ban kit ïa kiba shah pynmynsaw na ki jingtyngkhuh kali sha ka jaka ai jingsumar lane sha ka jaka ban ai jingsumar kaba kyrkieh na ka bynta jong ki, ha ka kynta kaba kordor ki lah ban ïoh ïa ka khusnam kaba T. 25,000. Lada don bun kiba mynsaw ha kano kano ka jingjia aksiden kiba lait im ha kajuh ka jingjia, u nongpyllait im un ïoh T. 25,000 na ka bynta kata ka jingjia.
Nalor ka jingai jingkyrshan pisa, ki nongpyllait im kin ïoh ruh ïa ka syrnot. Nalor kata, yn jied 10 ngut ki briew manla u snem na ka bynta ka khusnam jong ka ri kaba T.1 lak.
Kane ka skhim ka bud ïa ki jingbthah ba la pynmih da ka Ministry of Road Transport and Highways bad la kyrshan da ka Good Samaritan Rules hapoh ka Motor Vehicles (Amendment) Act, 2019.
Kine ki kyndon ki ïada ïa kito kiba ïarap mon sngewbha ïa kiba ngat ha ki jingjia aksiden na ka jingshah pyndik ha ka liang ka aiñ ne ka jingshah leh donbor.
Ka District Level Evaluation Committee, kaba kynthup ïa u District Magistrate, ki heh pulit, u Chief Medical Officer bad u Regional Transport Officer, kin pynshisha ïa ki jingjia.
Ïa ka pisa ai khusnam yn phah beit sha ki Bank Account jong ki nongïoh jingmyntoi lyngba ka rukom treikam Online.
Da ki hajar tylli ki kali ha ki surok jong ka Delhi man ka sngi, ki heh sorkar ki ong ba ka jingïarap kaba kham kloi ha ka shi kynta hadien ba la shah tynrah ka lah ban pynduna shibun ïa ka jingïap jong ki briew na ki jingjia aksiden.
La khmih lynti ba kane ka skhim kan weng ïa ka jingartatien kaba bun ki nongsakhi halor ka jingjia bad pynkhlaiñ ïa ka jingpyntreikam kaba kyrkieh ha ki jingjia aksiden ha kylleng ka nongbah.
