New Delhi, Rymphang:
U Myntri Rangbahduh ka ri India, u Narendra Modi, ha ka jingai jingkren jong u ha ka iingdorbar thaw aiñ jong ka Israel, u la phah ia ka khubor kaba khlaiñ pyrshah ia ki kam thombor jong ki lehnoh ha ka ka pyrthei baroh kawei bad ong ba ka India ka ieng ryngkat bad ka Israel, ban ialeh pyrshah ia kino- kino ki jingma bad ki kam thombor jong ki kynhun lehnoh, kiba ap khmih lynti tang ban pynthud ia ka shongsuk- shongsaiñ jong ki paidbah ba lui-lui.
La ong ba u Modi u la leit poi sha Israel, ha ka jingleit jurip ba kyrpang ban pynpaw ia ka jingkyrshan jong ka India, ia ka jingiakhun jong ka Israel pyrshah ia ki kam thombor jong ki lehnoh, kaba la jia ia ka Israel ha u Risaw jong u snem 2023, ha kaba ki lehnoh Hamas ki la leit ban thombor ia ka Israel bad kumba 1,200 tam ki mynsiem briew ki la duh ei ha katei ka jingleit thombor jongki. U Modi u la pyniasyriem ruh ia kane ka jingshah thombor ka Israel bad ka jingshah thombor jong ka India hapoh ka nongbah Mumbai, ha kaba palat 175 ngut ki briew ki la duh ei ia ka jingim ha ka jingleit thombor jong ki lehnoh hapoh ka ’26/11 Attack’. Namarkata, u Modi u la ong ba ka India ka sngewthuh shai ia ki jingma kiba ap na ki kam thombor jong ki lehnoh bad kumta ruh ka India ha kane ka por, ka ieng skhem ryngkat bad ka Israel ban ratdyngkhong ia ki kam thombor jong ki lehnoh.
Ka jingïadei jong ka India bad kane ka ri (Israel) ruh la thoh ha ka snam bad ka jinglen lade. Ha ka por jong ka thma bah ba nyngkong, palat 4,000 ngut ki shipai India ki la aiti ïa la ka jong ka jingim ha kane ka thaiñ. Ka jingshah thombor jong ki Haifa ha u Nailur jong u snem 1918 ka dang iai sah kum ka bynta ba kongsan eh ha ka histori shipai,” la bynrap u Modi.
