Gangtok, Rymphang:
Ka jinghap ïor kaba jur haduh katta katta, ka la ktah bha ïa ka Nathula Pass bad Tsomgo Lake kumba la sakhi ha kine ki sngi ba la dep, kaba la ktah jur ïa ki nongleit jingleit kiba la shah khang lynti ha shi lynter ka surok ha ki jaka ba jrong jong ka East Sikkim.
Da ki hajar ngut ki nongwan jngohkai pyrthei kiba la leit sha ki jaka ba itynnad ki la ngat ha ka jingshah khang lynti hadien ka jinghap jong ka ïor kaba la bteng ha kine ki ar sngi ba la leit.
Shuh shuh nalor kane, la ïathuh ba ki la don palat 2,700 ngut ki nongjngohkai pyrthei kiba sahkut lynti hajan ka pung Tsomgo ha East Sikkim namar ka jinghap bajur jong ka ïor ha kaba ki la shah pyllait im khlem kino kino ki jingeh, la ïathuh ki heh pulit ha ka sngi Balang.
Ka jingkylla ka mariang ka la ktah jur bha ha ki bynta jong ka Sherathang bad ki jaka ba marjan bad ka la wanrah ïa ka jingshah khang lynti jong ka surok, ha kaba haduh 541 tylli ki kali jong ki nongjngohkai pyrthei ki la sahkut hapdeng ka 15th Mile bad Tsomgo Lake.
Ka jingpyllait im kaba la ïatreilang ka la pynthikna ïa ka jingpynkynriah kaba shngaiñ bad kaba ryntih ïa baroh ki kali kiba kit ïa ki 2,736 ngut ki nongjngohkai pyrthei, ha kaba ïa ki jingpyntreikam la pynkut noh ha ka miet jong ka sngi Ba-ar..
Ka tnad jngohkai pyrthei jong ka Sikkim ka la ai jingmut ïa ki nongjngohkai pyrthei bad ki nongpynïaid jong ki kam jngohkai pyrthei ban bud ryntih ïa ki jingbthah halor ka jinglong ka suiñbneng bad ban pynthikna ba ki kali ki dei ban don ïa ki tiar kiba biang, kynthup ïa ki Snow Chain, haba ki leit jingleit ha ki thaiñ ba ju jur ka jinghap ïor.
