Washington, Rymphang:
Ka Instagram la ong ba kan peit bniah bad phah jingtip sha ki kmie- ki kpa jong kito ki khynnah-samla kiba wad jingtip bniah kumno ba kin shim ia la ka jong ka jingim, la pynbna da ki bor pyniaid jong katei ka rynsan paidbah ha ka Sngi Palei, hadien ba katei ka kompeni ka la sngewkhia halor ka jingbun ki nongpyndonkam ia katei ka rynsan, kiba dang hapoh 18 snem ka rta.Kine ki jingpynbna, ki ban sa mih ha ki taiew ban wan ha America, Bilat, Australia bad Canada, kin sa sdang haba u samla u wad bunsien ia kum kine ki kyntien hapoh ka por kaba lyngkot.
Ia kitei ki jingpynbna yn sa pynphriang sha kiwei pat ki thaiñ ha kine ki khyndiat por ban wan hapoh jong une hi u snem 2026.
Ki kmie ki kpa kiba ïaid lyngba ka rukom peitngor jong ki kmie ki kpa ha katei ka rynsan ‘Instagram’ kin ïoh ïa ki jingpyntip lyngba ka email, jingthoh lane WhatsApp bad kumjuh ruh lyngba katei ka app hi, ryngkat bad ki lad jingïarap ba tbit ban ïarap ïa ki ban ïaid lyngba ïa ki jingïakren kiba lah ban long kiba eh bad ki khun jong ki.
Ka Instagram ka la dep khanglad ïa ki jingwad ïa ki kyntien kiba ïadei bad ka jingpynïap ïalade bad ka jingpynmynsaw ïalade, da kaba bthah ïa ki nongpyndonkam ha ka jaka jong kata ban ïarap ïa ki lain bad ki seng ba kyrshan. Ki jingpynbna thymmai la shna khnang ban pynpaw ïa ki case ha kaba ki samla ki pyrshang beit ïa kum kine ki jingwad wat hapdeng kita ki jingkhang.
Ka Meta ka la ong ba ka la ïakren bad ka kynhun ai jingmut jong ka halor ka jingpynïap ïalade bad ka jingpynmynsaw ïalade ha kaba buh ïa u pud na ka bynta ki jingpynbna, da kaba bynrap ba ka la thmu ban bakla ha ka liang ka jingsumar wat la kata ka mut ba katto katne ki jingpynbna ki lah ban phah khlem ka daw ba shisha ban sngewkhia.
Kane ka jingpynbna ka la mih ha ka por ba ka kompeni ka iakynduh ia ka jingpynbor kaba jur bha ha ka liang ka ain halor ka jingpyndonkam ia ki platform jong ka da ki samla.
U Mark Zuckerberg, CEO jong ka Meta, u la ai sakhi mynta u bnai, ha ka jingbishar kaba pawnam bha ha California halor ki jingkynnoh ba ka kompeni jong u bad kiwei ki thmu ban pynlong jingdih buaid ïa ki khynnah rit — ka dei ka sien kaba nyngkong ba kum kane ka mukotduma, ka la poi sha ka jury.
Ka Meta ka dang ïakhun ruh bad ka jingpynbor kaba jur ha ka pyrthei ban khanglad ïa ki khynnah ba kin ïoh ïa ki social media, ha kaba ka Australia ka la khang ïa ki khynnah kiba hapoh 16 snem na ki platform ha u bnai December bad ki ri kiba kynthup ïa ka France, Denmark, Spain bad UK ki ïakhun ban wanrah ïa ki juh ki lad ki lynti.
