Shillong, Lber 09
Ka Sorkar Jylla ka la bthah ïa baroh ki Deputy Commissioner kynthup ïa ka West Garo Hills – ban khot ïa ki jingïalang ‘Peace Committee’ bad ki nongïalam paidbah jong ka imlang-sahlang bad kyrpad na bynta ka jingjai-jai hadien jong ka jingïakhih kaba la khanglad ïa uwei u nongmihkhmat barim ban thep kyrteng na ka bynta ka ilekshon sha ka Garo Hills Autonomous Dis-trict Council (GHADC) kaba la buh ban long ha ka 10 tarik, Ïaïong.
U Commissioner & Secretary ka tnad kam pohïing & District Council Affairs (DCA), Bah Cyril Diengdoh u la ong ba yn sa phah shuh ïa ki bor pahara ban pyntikna ba ka ilekshon GHADC kan long kaba ïaid beit ïaid ryntih.
“Phi la ïohsngew ïa ka jingjia mynta ka sngi. Kumta, ngi la don ka jingkhmih bniah bad baroh ki DC kynthup ïa u DC ka Tura. Ngi la ong ïa u DC ban khot lang ïa baroh ki jaidbynriew bad ban don ki jingïalang ‘Peace Committee’ bad ban kyrpad na bynta ka jingsuk.
Ïa kine ki jingbthah la dep ban phah,” u la ong haba kren sha ki nongthoh khubor.
U la ong ba u SP ka West Garo Hills u la kyrpad shuh ïa ki bor pahara bad dang khmih bniah ïa ki lad jingpynbeit.
“Yn sa phah shuh ïa ki bor pahara,” la pyntikna u Bah Diengdoh.
Na ka liang u Commissioner & Secretary u la pyntikna ba ka la don ka jingujor kaba la ujor halor ka jingjia ba mynstep.
“Uwei na ki kyrtong u la leit ban thep kyrteng…ha ka por 10 baje mynstep…bad la khanglad ïa u,” u la ong.
Ha kajuh ka por, u DC un sa aiti ïa ka kaiphod kaba shisha halor kaei kaba la jia.
Haba kylli halor ka hukum jong ka GHADC haba ïadei bad ka jinglong kongsan jong ki syrnot ‘Scheduled Tribe’, u Bah Diengdoh u la ong ba kane “ka la leit sha ka ‘High Court'” bad ka Sorkar kan ïai ap ïa ka rai jong ka.
Ka jingthep kyrteng na bynta ka ilekshon GHADC ka la plie ha ka Lah Sngi U Blei (10 baje mynstep-3 baje janmiet) bad kan kut ha ka 16 tarik u Lber; katba ka jingpeit bniah ïa ki kot ki sla la buh ha ka 17 tarik u Lber.
Kumba ka long, ym shym la don kyrtong kiba la thep kyrteng ha ka Lah Sngi U Blei.
“Ym don jingthmu kumta (ban pynjlan)…ngi dang khmih bniah ïa ka jinglong-jingman…ngi dang ap ïa ki kaiphod, ngin sa peit katba ka jinglong-jingman ka nang ïaid”, la ong u Bah Diengdoh.
