Shillong, Lber 09
Ki bor distrik ka West Garo Hills ha ka Lah Sngi U Blei ki la pynjari da ka korphiw naduh ka por 6 baje janmiet haduh ka por 6 baje mynstep ha ki 37 tylli ki shnong ba la ithuh kum ki “jaka ba don jingma” ha ka distrik, hadien ka jingïakhih jong ki NGO kiba pyrshah ïa ka jingïashim bynta jong ki bym dei ‘riewlum ban thep kyrteng ha ka ilekshon GHADC.
U District Magistrate, u Vibhor Aggarwal u la pyntreikam ïa ka kyndon 163 jong ka BNSS, kaba khang ïa ki jingïalang jong 5 ne palat ngut ki briew bad ki tiar ïaleh ha ki 17 tylli ki shnong kiba hap hapoh ka Hallidayganj bad 20 tylli ki shnong kiba hap hapoh ki thanad pulit ha Phulbari- haba thep kyrteng na ka bynta ka ilekshon sha ka GHADC ha ka 10 tarik u Ïaïong naduh ka 9-16 tarik u Lber.
Ka hukum ka la kdew ïa ki jingma kiba lah ban mih kum ka jingkhanglad ïa ka jingïaid jong ki kali, ka jingpyntieng bad ka jingïakynad jaidbynriew ha ki jaka thor ba shong ba sah ki jaidbynriew ba ïakhleh lang.
“Kano-kano ka jingpynkheiñ ïa kane ka hukum kan khring ïa ki kyndon pynshitom katkum ka kyndon 223 jong ka BNS bad kino-kino kiwei pat ki kyndon kiba ïadei bad ïahap katkum kane ka kyndon,” la ong u Aggarwal ha ka hukum.
