Shillong, Lber 09
U Bah Kitborlang Nongphlang, Vice President ka Federation of Khasi Jaiñtia & Garo People (FKJGP) u la ong ba ka jingïasoi soskular ka Sorkar lyngba ka tnad Urban Affairs bad u bar jylla ban shna petrol pump ka la ong kumba ai ei beit ha u ïa ka jaka namar ka dor ka long tang 1 tyngka 1 sq.ft shisnem kaba mut ba une u bar jylla un siew tang 13, 181 tyngka shi snem namar ka jaka kadei 13, 181 sq.ft.
Haba kren sha ki lad pathai khubor ha ka sngi Nyngkong jong ka taïew, u Bah Kitborlang u la kdew ba ka tnad Urban Affairs ka ai jingmynjur ruh ban ai lad ïa une u bar jylla ban shna ïa ki restaurant, ki shopping complex, ki jaka sait kali, ka dhaba bad kiwei-kiwei de.
“Kane ka jingïasoi la ong ba une u bar jylla un long u trai pura jong katei ka jaka bad u lah ruh ban ai pateng ïa kane ka jaka hadien habud,” u la ong.
U Bah Kitborlang u la kynnoh ruh ba kane ka paw shai ba ki ophisar ka tnad Urban Affairs ki leh tang ban ïa kamai pisa. Nalorkata, u Bah Kitborlang u la kynthoh jur ïa ka Sorkar MDA da kaba ong “Kane ka dei ka jingleh business kaba don ka jingïasuh buit hapdeng u bar jylla bad ki briew ka Sorkar”.
“Ka seng naduh u snem 2023, ka la pyrshah ïa ka jingai jaka ka Sorkar sha u briew u bym dei u trai ri trai muluk, hynrei katba dangmih ki sngi ki snem kane ka jingai jaka sha ki briew ba nabar ka la nangjur,” u la ong. Shuh shuh u la buh jingkylli ruh ba balei ka Sorkar ka hap ban ai jaka kyrpang ïa ki bar jylla. “Mynta lada don u Khasi uba shong ha ki jaka jong ka Sorkar ban shong beaiñ ki kyndang ïa ki, katba ïa u bar jylla pat hap ban ai ïa kata ka jaka kaba heh”.
“Ka petrol pump ha Anjalee lada ngi peit kam duna lane tam ïa ka ar hajar square feet hynrei hangne ka Sorkar ka la ai haduh 13,181 square feet.”
Kumta u la ong ba ka seng kan aiti sha ka Sorkar ha ka jingstad jong ka bad ban ñiew katno ngut kiba pyrshah bad lada kane ka jingpyrshah da kaba jai jai kam shym long kaba seisoh ka seng kan sa shim da kiwei pat ki sienjam.
