Tehran, Lber:
Ka tnat ïada ri jong ka Iran, ha ka Sngi U Blei ka la pyntip ba ki shipai jong ka Iran ki lah ban ïakhun pyrshah ia ka United States bad ka Israel kumba 6 bnai lynter khlem jingpyndem ne kynran dien bad ia kane la kren hadien ba katto- katne ki heh shipai ka Iran ki la kyllon iap hapdeng ki jingiakhun bad ki shipai ka Israel bad US hapoh ka nongbah Beirut.
Katba ka jingïakynad ka nang pur sha ka taiew kaba ar, ki jingktah ha ka thaiñ ki la nang jur, ha kaba ka Saudi Arabia ka la khanglad ïa ka jingwan jong ki drone kiba leit sha ki thong kynthup ïa ka jaka sah jong ki nongïalam ha ka nongbah Riyadh bad ka Kuwait da kaba ong ba ka jingshah thombor ka la ktah ïa ki tank umphniang ha ka kad liengsuiñ jong ka.
Ka jingshah thngan ha ka jaka buh umphniang liengsuiñ jong ka Kuwait ka la pynjur ïa ka jingtieng halor ka jingpynbiang bor ding ha kaba ka kompeni umphniang jong ka ri ka la pynbna ruh ban pynduna ïa ka jingpynmih umphniang namar ka jingma ïa ka Strait of Hormuz, ha kaba shi bynta na ka san bynta jong ka umphniang bad gas ha ka pyrthei ka leit ka wan.
Ka Iran ka la kynnoh ïa ka US bad ka Israel ba ki la hiar thma ïa kawei ka jaka buh umphniang ha ka nongbah jong ka Iran ha ka sngi saitjaiñ, kaba dei ka jinghiar thma kaba nyngkong eh ïa ki jingtei umphniang jong ka ri Islamic namar ba ki iew stock ki la hiar bad ka dor jong u umphniang ka la kiew.
Ka tnat shipai jong ka Israel ka la ong ba ka la ther ïa “ki katto katne ki jaka buh umphniang ha Tehran” kiba la pyndonkam “ban pynïaid ïa ki jingtei shipai”.
Ki shipai jong ka Israel ki la pynlong ruh ïa ka jinghiar thma kaba thymmai “ha kylleng ka Tehran” ha ka Sngi U Blei, hadien ba ki la pynlong ïa ka jinghiar thma kaba thikna bha kaba la thmu ïa ki “ki nongialam ba kongsan” ha ka Quds Force, ka tnad treikam bar ri jong ki shipai pahara jong ka Iran, ha kawei ka hotel ha ka jaka jong ka Beirut pdeng kaba ki nongjngohkai pyrthei ki sngewtynnad bha.
Ka tnat ka koit ka khiah jong ka Lebanon, ka iathuh ba katei ka jingshah thombor, ka la pyniap ia ym duna ia ka saw ngut ki briew, ha katei ka hotel, ha kaba u nongthoh khubor, ula iohi ia ki jingkhang, kiba la pra bad ki kynroh, kiba la ingkhong ding.
U Benjamin Netanyahu, Myntri Rangbah duh jong ka Israel, u la byrngem ban ïai bteng ïa ka thma pyrshah ïa ka Iran “da ka bor jong ngi baroh”, da ka jingthmu ban pynduh jait ïa ki nongïalam jong ka ri, hadien ba ki jinghiar thma lang jong ka US bad Israel, ki la pynïap ïa u nongïalam ba ha khlieh duh, u Ayatollah Ali Khamenei, ha ka taiew ba ladep, kaba la pynmih ïa ka jingïakynad ha kane ka thaiñ.
Wat hapdeng ka jingbyrngem, ki Revolutionary Guards ki la ong ha ka Sngi U Blei ba ki shipai jong ka Islamic republic ki lah ban pynlong ïa ka “thma kaba jur” haduh hynriew bnai ha ka jingstet jong ka jingïaleh kaba mynta.
U nongaiktien jong ki Guards, U Ali Mohammad Naini, u iathuh ba ka Iran, haduh mynta, ka la pyndonkam da ki namding “ba nyngkong bad ba ar jong ka pateng”, hynrei, kan sa pyndonkam pat, ha ki sngi ban wan, da ki namding kiba kham tbit bad kiba kham duna ka jingpyndonkam.
