Shillong, Lber 09
Hadien ka jingïoh jingujor na ki samla kiba trei ha Dietary Services ka North Eastern Indira Gandhi Regional Institute of Health and Medical Services (NEIGRIHMS) hospital, haba ïadei bad ka jingbym pat ïoh ïa ka tulop jong u bnai Jymmang, Jylliew bad Naitung, jong u snem 2025, na ka liang ka Voice of The People Party (VPP) Youth Wing, ha ka 09 tarik u Lber, 2026, ka la leit ban ïakynduh ïa u Deputy Director u Pawan Deep, jong ka tei ka hospital ban ïakren halor kane ka mat.
Haba kren sha ki lad pathai khubor, u Bah Marbud Dkhar, President, u la ïathuh ba ha ka jingïakren na ka liang u Deputy Director, u la ong ba ka daw jong ka jingslem ban siew ïa ka tulop kaba sah ki nongtrei ka dei namar ka jingdon jong kiba bun ki daw ha kaba u la pynpaw ba ha ka step jong katei hi ka sngi, na ka liang jong u, u la sei na ka fund jong ka hospital bad ban siew pyndep ïa ka tulop jong kine ki nongtrei. Nalor kata, u la pynpaw ka jingdiaw ba don kum kine ki jingjia bad kumta u la kyntu ïa ki tnad bapher-bapher ba kum kine ki jingjia kin ym dei ban jia nangne shakhmat.
