Shillong, Lber 09
U Lat ka Jylla u CH Vijayashankar u la kyntu ïa ki tnad Sorkar, ki shnong ki thaw bad ki sengbhalang ban pynleit jingmut ïa ka jingtrei ba ïadei ka koit ka khiah jong ki kynthei, ka jingpule bad ka jingshngaiñ, ba ka Jylla ka rakhe ïa ka sngi burom jong ki kynthei (Women’s Day) bad ka jingdap ba 11 snem ka Beti Bachao Beti Padhao ha Lok Bhavan.
Ïa kane ka prokram la pynlong da ka State Sankalp Hub for Empowerment of Women ryngkat ka jingïatreilang bad ka tnad ka Koit ka Khiah ka Jylla, ka tnad Public Health Engineering bad ka Meghalaya State Rural Livelihood Society halor ka phang pdeng “Give to Gain.”
U Vijayashankar u la ong ba ka jingpynkup bor ïa ki kynthei bad ban pynthikna ïa ka jingïaryngkat ki lad ki lynti ka long kiba kongsan bha na ka bynta ban tei ïa ka imlang sahlang kaba khlaiñ bad kaba kynthup ïa baroh lang.
U la kdew ba kane ka prokram ka dei ruh kum ka jingrakhe ïa ka jingdap 11 snem jong ka ‘Beti Bachao Beti Padhao’ kaba la sdang hapoh ka jingïalam jong u Myntri Rangbahduh ka ri u Narendra Modi, kaba thmu ban kyntiew ïa ka jingïada, ka jingnang jingstad bad ka bha ka miat jong ka khynnah kynthei.
U Lat u la ong ba kane ka jingïalang ka la ailad ban bishar bniah ïa ka jingkiew bad ban pynskhem biang ïa ki jingkular na ka bynta ka jingpynkupbor bad ka jingbha jingmiat jong ki kynthei.
Haba ïadei bad ki kyndon jong ka riti synshar ka ri, u la ban jur ba ka jingïaryngkat ka long katkum ka Article 15 jong ka Riti Synshar ka ri India, kaba khang pyrshah ïa ka jingïapher jaitbynriew, Caste, ka jingngeit, ka jinglong kynthei ne shynrang.
U Lat u la kdew ruh ba ka jingïadon bynta jong ki kynthei ha ka Ïingdorbar Thawaiñ ka Jylla Meghalaya ka dang duna bha, ha kaba ki don tang lai ngut ki kynthei napdeng ki 60 ngut ki dkhot bad pynpaw ïa ka jingkyrmen ba ka jingthmu ban buh kyrpang 33% ïa ki kynthei ha ki Ïingdorbar Thawaiñ kan pynkiew shibun ïa ka jingïashim bynta ki kynthei ha ki por ban wan.
Shuh-shuh u la pynpaw ka jingsngewkhia halor ka jingshongkha khynnah da kaba batai ba ka dei ka mat kaba ktah jur bha ïa ka koit ka khiah, ka jingnang jingstad bad ka lawei jong ki khynnah kynthei ha Meghalaya bad ha kylleng ka ri, u la ban jur ïa ka jingdonkam ban pynsngewthuh kham bha, ban pynbha ïa ka lad ban ïoh ïa ka jingnang jingstad bad ka jingkyrshan kaba khlaiñ jong ki paidbah ban weng ïa ka jingeh.
Haba kren ha kane ka sngi, ka Kong Santa Mary Shylla nongmihkhmat ka Sutnga-Saipung ka la ong ba ki kynthei ha Meghalaya ki ïoh ïa ka jingkyrshan kaba kham jur ha ki bynta kum ka pule puthi, ka jingïalehkai bad kiwei ki bynta.
Ka la ai burom ruh ïa ka jingïalam jong u Conrad K Sangma na ka bynta ban pynkhlaiñ ïa ki jingtrei ki kynthei, khamtam lyngba ki Self Help Group (SHG), kiba la thaw ïa ki lad ki lynti bad kyntiew ïa ka bynta jong ki kynthei ha ka imlang sahlang.
U Bah Paul Lyngdoh nongaibuit ka tnad Social Welfare u la pynpaw ba ka Jylla Meghalaya ka dei ka Jylla kaba kham kyrpang da kaba u la kdew ba ka jaitbynriew Khasi-Jaiñtia bad Garo ki dei kiba ai jait sha ka kynthei bad kaba ai burom ïa ka kynthei hapoh ka imlang ka sahlang.
Ha kane ka prokram la sam ïa ki tiar sumar sha ki Urban ICDS Projects. La sam ruh ïa ki khusnam hapoh ka jingïalap ka Swasth Nari, Sashakt Parivar Abhiyaan (SNSPA) da ka tnat ka Koit ka Khiah, na ka bynta kiba la noh synñiang bad len lade sha ka jingpynkup bor ïa ki kynthei da ka Meghalaya State Rural Livelihood Society bad na ka bynta ka jingtbit ha ka kam ba la ïalam ha ka imlang sahlang ka FTK- ka jingpeit bniah ïa ka jingpynpoi um ka skhim Jal Jeevan Mission.
