Shillong, Lber 09
Ha ka step jong ka 09 tarik u Lber 2026, u BDO ka Mylliem, u Bah Toshan Marweiñ u la khot ban pynlong ïa ka jingjurip halor ka jingmih ka jingpyrshah ban shna ïa ka petrol pump ha 6 mer.
Nalor u BDO la ïadon -lang ki ophisar ka Animal Husbandry & Veterinary, General Mana -ger (P), NHIDCL, PMU (Mylliem), ki dkhot ka Dorbar Shnong 5 Mer Upper Shillong, ka Synjuk ki Nongsyn-shar Shnong Upper Shillong bad ka M/s Ashok Auto Service Owner Anjalee Petrol Pump, ha ryngkat ka jingïadon lang ruh ka seng Federation of Khasi Jaiñtia & Garo People (FKJGP).
Ha kane ka sngi u BDO u la aiti nyngkong sha ki ophisar ban batai halor ka jingaiti ban shna ïa katei ka petrol pump.
Ka Synjuk ki Nongsynshar Shnong ryngkat bad ki nongïalam ka FKJGP ki la pynpaw ka jingpyrshah halor ka jingïoh jaka kine ki briew ba nabar ban kynriah na Petrol Pump Anjalee bad ban ïoh jaka pat ha 6 mer.
Ki la pynpaw ruh da kaba ong ba katkum ka jingïasoi soskular ka long ba kine ki petrol pump ym tang ba kin ïoh ban shna tang ïa ka petrol pump hynrei kin ïoh ruh ka lad ban shna ka restaurant, jaka sait kali nalor kiwei kiwei de, bad kaba la ïasoi ka long ba kane ka jaka kan long beit ka jaka pura jong kine ki bar jylla ba ki lah ban ai pateng ruh ha ki por ban wan.
Kumta ki la pynpaw ka jingpyrshah ban shna ïa katei ka petrol pump kaba dei ka jaka jong ka tnad Veterinary.
Ki la ïathuh ruh ba ka Sorkar ka ai kumba 1 tyngka 1 phut sha kane ka petrol pump ban siew, kumta ki pyrshah jur halor kane ka jingai jaka.
Kane ka jingai jaka ka Sorkar sha ki trai ka petrol pump kaba na Anjalee ban shna sa ha 6 mer kam shym la pynhun ïa baroh ki nongshong shnong bad ki sengbhalang namar ba kim shym pat ïohi ïa ki kot ki sla kiba dei bad kata ka jingïateh ai wai jaka bad ki shipai.
Ha kane ka sngi ka la don ka jingïatai nia kaba shyrkhei hapdeng ki ophisar ryngkat bad ki nongïalam ka Synjuk ki nongïalam Shnong Upper Shillong, ha kaba ki nongsynshar shnong ki la kren shai ba kim pyrshah ïa kano-kano ka kam pynroi hynrei ka jingmut ka long hi ba kin ïoh ka jingpynshai.
Haba kren sha ki lad pathai khubor u Bah Arju Dkhar u nongïalam ka Synjuk ki Nongsynshar Shnong u la ong ba na ka liang jong ki, ki dawa ïa ki kot ki sla ba ki dei ban ïoh ban peitbniah ba kata ka jingthmu ka Sorkar ban ai jaka ban shna petrol pump ka shongnñia ne-em.
“Mynshuwa ha Anjalee u ïoh ka jaka kaba hap ha ka Defence Land bad kumta ka donkam ïa ki ban tip ïa kata ka jingïateh bad ban pynbor ïa u trai ka petrol pump u dei ban ai ha u BDO,” u la ong.
