Shillong, Lber 09
Ka North Eastern Council (NEC) ka la pyllait ïa ka song pisa kaba T.67.41 klur ha u bnai Rymphang na ka bynta ki skhim ha kylleng ki 8 tylli ki Jylla ka Thaiñ Shatei Lam Mihngi bad ki tnad treikam jong ka thaiñ, kaba thmu na bynta ki surok, ki buit thymmai ha ki jaka rep, kam jngohkai pyrthei, jingwad bniah bad ki kam ba ïadei bad ka kolshor.
Jan shiteng-kata T.30.07 klur-ka leit sha ki shlem pule kum ka IIT-Guwahati, IIM-Shillong, NESAC bad NERCORMS.
Haba phai sha Meghalaya, ka pisa ka kynthup na bynta ka jingkieng RCC halor ka Wah Lunar kaba pynïasoh ïa ka Khaddum sha Brichyrnot ha East Jaiñtia Hills bad ïa ka Seng Khasi Cultural Complex ha Lum Shat Sngi, Kenches Trace, Shillong.
“Napdeng ki Jylla kiba ïoh jingmyntoi na katei ka jingpyllait pisa ba la kdew haneng, ka Meghalaya ka la ïoh jingkyrshan na ka bynta ki projek pynroi bapher-bapher kiba dang ïaid shakhmat – kiba thmu ban pynkhlaiñ ïa ka jingpynïasoh bad ban kyntiew ïa ka riti-dustur ha ka Jylla. Kawei na ki jingthmu ba kongsan ka kynthup ïa ka jingtei ïa ka jingkieng RCC halor ka Wah Lunar ban pynïasoh ïa ka Khaddum sha Brichyrnot, East Jaiñtia Hills, ka ban pynbha ïa ki lad jingpynïasoh ha ki jaka nongkyndong kumjuh ïa ki lad ki lynti ba suk ban ïoh na ka bynta ki nongshong shnong, kynthup ïa ka jaidbynriew Hmar,” ong ka kyrwoh. Nalor kata, ka NEC ka kyrshan ïa ka kam pynroi haba ïadei bad ka Cultural Complex jong ka Seng Khasi Ri Raid Laban ha Lum Shat Sngi, Kenches Trace, Shillong, kaba la khmih lynti ba kan long kum ka jaka pdeng kaba kongsan ban pynneh-pynsah bad kyntiew ïa ka lariti tynrai bad ki riti-dustur jong ka thaiñ.
“Ïa kine ki sienjam la khmih lynti ba kin pynkhlaiñ ïa ki jingtei, kyntiew ïa ka jingpynneh-pynsah ïa ka kolshor kumjuh ïa ki lad ha ka liang ka ïoh ka kot ha ka imlang-sahlang na ka bynta ki nongshong shnong. Lyngba kum kine ki jingïarap, ka NEC ka ïai bteng ban don ïa ka bynta kaba kongsan ha ka ban kyntiew ïa ka roi ka par kaba neh, ka jingpynïasoh ha ka thaiñ, bad ka jingkyntiew ïa ka kolshor ha kylleng ka Thaiñ Shatei Lam Mihngi,” la ong.
Nalor ka jingmang pisa ba kyrpang sha ki Jylla, ka NEC ka la pyllait ruh T.30,07,14,985 sha ki Regional Institute bad kiwei-kiwei ki tnad treikam ha kylleng ka Thaiñ Shatei Lam Mihngi hapoh jong une u bnai.
Ki jingïarap ba kongsan ha ka liang ki projek ki kynthup ïa ki jingthmu ha ka rep ka riang kaba neh, ka jingpynroi ïa ka seng kam seng jam kynthup ïa ka rep ka riang kaba pynshong nongrim ha ka AI, ka jingthaw ïa ki jingtei, ka jingpynïeng ïa ki jaka ïalehkai, ka jingkyntiew ïa ka kam jngohkai pyrthei, ki kam wad bniah bad ki jingpynwandur thymmai, lem bad ka jingpynroi ïa ki lad kamai.
Ïa kine ki sienjam la pyntreikam lyngba ki shlem pule ba paw, kynthup ïa ka IIT-Guwahati, IIM-Shillong, Northeast Space Application Centre (NESAC), North East Handicraft and Handloom Development Corporation (NEHHDC), North East Region Community Resource Management Society (NERCORMS) bad kiwei-kiwei ki skulbah bad ki kynhun ba kyrpang jong ka thaiñ.
Nalor ka jingai pisa katkum ka projek, ka NEC ka kyrshan ruh ïa ki katto-katne ki kam ki bym don jingïadei bad ki projek bad kyrshan ruh ïa ki prokram ha ka liang ka kolshor & jingpule hapoh une u bnai, kiba thmu ban pynkhlaiñ ïa ka jingïasam jingtip, ka jingpynneh-pynsah ïa ka kolshor, ka jingkyntiew ïa ka kam jngohkai pyrthei, bad ka jingïashim bynta jong ki samla ha ka thaiñ.
Ki jingthmu ba kongsan ki kynthup ïa ka jingkyrshan na bynta ki jingïalang jong ki ri ka pyrthei bad ka thaiñ, ki prokram ‘Skill Development’, ki ‘workshop’ ba ïadei bad ki kam jngohkai pyrthei, ki tamasa kolshor bad kiwei-kiwei.
Ki jingïalang kiba paw kiba la pynlong ha ki bnai ba la dep ki kynthup ïa ka International Conference on Knowledge Organization in Academic Libraries (I-KOAL-2026), Regional International Conference on Natural Language Processing (RegICON), Manipur State Level Kiwi Fruit Festival, bad ki tamasa bapher-bapher jong ka kolshor bad ka kam shna jingshna ha kylleng ka thaiñ.
Shuh shuh ka NEC ka la ong ba kine ki jingïalang ki kyntiew ïa ka jingïatreilang, ki buit pynwandur thymmai bad ka jingpynneh-pynsah ïa ka pateng kolshor jong ka Thaiñ Shatei Lam Mihngi.
