Shillong, Lber 09
U Myntri Rangbah ka Jylla u Conrad Sangma u la pynpaw ka jingbitar bad pynrem jur namar ka jingïaibteng ka jingshah lehbeiñ bad jingshah thombor ïa ki nongshong shnong ka thaiñ Northeast ha ki jaka pdeng ka ri Inda.
U Myntri Rangbah haba pynpaw ha ka rynsan X u la ong “Ka long ka jingbitar namar ka jingshah thombor ba man ka por ïa ki briew jong ka thaiñ Shatei Lam-mihngi ha Mainland India. Ka jingshah shoh jong ki arngut ki briew jong ngi na Manipur bad Assam hajan Saket Court, Delhi, ka long kaba ijli. Ym dei ban pdiang ïa ka jingshah lehbeiñ jaitbynriew kum ka rukom kaba thymmai bad ngi dei ban leh pyrshah ïa kane.”
Kane ka dei halor ka jingjia ba la jia ha ka sngi u Blei ba ki don ki kynthei na Assam bad na Manipur kiba ïaid hajan ka jaka shongkai (park) ryngkat ki paralok bad ki la shah kren sniew ha ka kynhun jong ki shynrang bad haba kawei ka kynthei ka la tuklar ïa ki, kine ki shynrang ki la thombor ïa ki ha kaba ki la mynsaw.
Ïa kine kiba mynsaw la rah noh sha Safdarjung Hospital bad ka kaiphod phah sumar ka ong ba ki don ïa ki jingmynsaw ba malu mala.
Katba ki pulit ka Delhi ki la jubab ïa u Conrad ha ka rynsan X ba ki la pynrung mukotduma halor kane katkum ki kyndon jong ka aiñ. Ki pulit ka Delhi ki la ong ba ki dang ïai don ha syndah jong kine ki lanot bad ki la pynbiang ruh ïa ki jingdonkam jong ki. Ki la ïathuh ruh ba la ïoh ban kem ïa uwei u khynnah rit bad ki dang ïai thwet ïa kiwei pat kiba donkti.
Kum kine ki jingshah niewbeiñ ïa ki nongshong shnong ka thaiñ Shatei Lam-Mihngi ki la jia ruh ha kine ki khyndiat taïew ha nongbah Delhi ha kaba 3 ngut ki samla na Arunachal Pradesh ki la shah kren beiñ bad shah kren tohmet ha ki shikurim kiba ïasah marjan.
