Shillong, Lber 09
Ka lynti sha ka ilekshon ban wan sha ka Garo Hills Autonomous District Council (GHADC) ka la sniewdur mynta ka step hadien ba u MLA barim ka Phulbari, u SG Esmatur Mominin (Rahibul) ryngkat ki nongkyrshan jong u ki la shah thombor ha ka kynhun ki briew ki bym lah ban ithuh satia katba ki dang leit ban thep kyrteng na ka bynta ka ilekshon ha sor Tura.
Hashuwa, ka jinglong-jingman ha Tura ka long kaba shong syier hadien ka jingkhang dam kaba la khot da ka kynhun ka bym ithuh satia kaba la pyntikna ba ki dukan kin khang khyrdep ïa ki jingkhang jong ki baroh shisngi.
Katkum ki tyllong khubor ba la ïoh lum, u Mominin u la poi dang step phyrngap ryngkat ka kynhun ki nongkyrshan kiba don 4-5 ngut, ban leit sha ophis u DC – WGH ban thep kyrteng, watla ka GHADC dang shen ka la pynmih ïa ka hukum ba ki kyrtong ki donkam ïa ka syrnot ST ban ïashim bynta ha ka ilekshon ban wan sha ka GHADC.
Hadien ka jingshah thombor jong u Mominin, ka kynhun ki nongkyrshan jong u kaba la lait phet na ka jaka thombor, ka la shah thombor hadien ha kawei pat ka kynhun hajan Hawakhana. Katba ki tyllong khubor Sorkar kim pat pyntikna ïa kano-kano ka jingjia, ki tyllong khubor na ka thaiñ ki la ïathuh ba uwei u briew u la mynsaw jur ha ka por ba shah thombor.
Ka jingthep kyrteng ka la sdang mynta ka step bad kan bteng haduh ka 16 tarik u Lber.
Ki tyllong khubor ki la pyntikna ba ka jingpyrshang ban thep kyrteng da u MLA barim kam shym la seisoh bad u la hap ban weng noh hadien ka jingshah thombor (jong u) bad ki nongkyrshan jong u. Ym pat don kano-kano ka jingujor kaba pura halor kane ka kam haduh mynta bad ka lah ban long ba yn sa rah ïa kane ka mat sha Meghalaya High Court ban kyrpad pynbeit ïa kane ka kam.
Ki tyllong khubor ki ïathuh ruh ba mynta ka kynhun ki ‘Volunteer’ ki dang ap hakhmat ka ophis jong u DC – WGH ban khanglad ïa ka jingïashim bynta jong ki kyrtong ki bym dei ki ‘riewlum ha ka ilekshon MDC ban wan – ka kam kaba la buh ïa ka thaiñ Garo baroh kawei ha ka jingkhuslai ha kine ki khyndiat bnai ba la dep.
Ha kawei ka liang, ki jingjia kiba dang shen mynta ka step ki la pynbor ïa ki bor distrik ban pynjari da ka korphiw ha baroh kawei ka distrik khnang ban khang na ka jingnang heh shuh-shuh jong ki jingkulmar katba dang ap khmih lynti ïa ka ilekshon sha ka Council.
Katkum ki tyllong khubor, la ïathuh ba ka jinglong-jingman ha ki jaka thor kumba long lem ha kiwei pat ki bynta jong ka distrik jong ka WGH ka dang shong syier hadien ka jingshah thombor jong u MLA barim bad MDC bad ka jingpyrshang ban pynïasuk ka dang ïaid mynta ban pyntikna ïa ka shong suk shong shngaiñ ha ka thaiñ.
Ha kajuh ka por, ka tyllong khubor na ki jaka thor jong ka WGH ka la pyntikna ba ka ophis jong ka GSU ha Chibinang hapoh ka Shyamnagar GHADC konstitwensi, ka la shah wiang ding ha ka kynhun ki briew ki bym ithuh satia, kaba lah ban long namar ka jingshah thombor jong u MLA barim. Ka jinglong-jingman ha ki jaka thor ka WGH ka dang shong syier haduh mynta watla ym shym la don kano-kano ka jingjia kaba la jia haduh ba thoh ïa kane ka khubor.
