Shillong, Lber 09
Ka Sorkar Kerala kan pdiang burom ïa u khlur ïalehkai na Malayali u Sanju Samson, uba la ïoh ïa ka nam player of the tournament ha ka T20 World Cup.
U Myntri ka tnat pule puthi u V. Sivankutty u la pyntip ba ïa u Sanju yn pynkup burom ha ka jingïalang kaban long ha Thiruvananthapuram. U myntri u la ong ba u Sanju u dei u khun uba la rah ïa ka burom jong ka Kerala. U la ïaroh ruh ïa ka jingtrei shitom jong u Sanju, kaba u la ïakhun khlem shongthait watla u la shah kyntait bunsien ha ka jingïaid lynti jong u.
‘Watla bunsien um shym la ïoh ka lad ban shah kynthup hapoh ka kynhun, hynrei u Sanju u la lah ban ïoh ïa ka jingïaroh na kylleng ka pyrthei baroh kawei lyngba ka jingtrei shitom jong u. Ka sorkar kan pynbeit ïa ka jingpdiang burom kaba khraw ïa u Sanju ha ka rukom kaba iphuh iphieng,’ la ong u Sivankutty.
Shuh shuh u myntri un ïakynduh ïa u kpa jong u Sanju mynta ka sngi ban pyntip sha u shaphang ka jingpdiang sngewbha.
Lah ban kdew ba kane ka jinglah ban khur ïa ka nam lahduh ka India ha ka sien kaba lai ha ka ICC T20 World Cup ka la wan lyngba ka jingïalehkai bha u Sanju Samson kum u nongtied uba kynsai na ka bynta ban pynlong ïa ka India ban pynliem noh ïa ka New Zealand da 96 run ha ka jingïakhun final kaba la long ha ka sngi U Blei ha Narendra Modi Stadium, Ahmedabad.
Utei u khlur ïalehkai na Kerala u la lah ban tied 89 run na ki 46 bol, ryngkat u Abhishek Sharma bad Ishan Kishan, kiba la lah ban khyrwit ïa ki shiteng spah (half century) na ka bynta ka India.
Kumba ka paw kane ka 89 run ba la ïoh da u Sanju ka long kaba heh duh ha ka jinglah ban kamai ha ka jingïakhun final jong ka T20 World Cup, ha kaba u la lah ban tam ïa u Marlon Samuels uba la tied 85 un ha u snem 2016 bad u Kane Williams uba la tied 85 ha u 2021. Te kumta u Samson u la lah ban don lang hapoh ka thup jong ki khlur ïalehkai barim kum u Shahid Afridi ha u smem 2009 bad u Virat Kohli ha u snem 2014.
