Raipur, Lber:
Ka jingkhynra lehnoh jong ki shipai ha kylleng ki bynta jong ka jylla Chhattisgarh, ka la ïai bteng khnang ban lah ban pynkut noh ïa ki kam pyntriem jong ki lehnoh Naxal kumba la buhthong da ka sorkar pdeng, ha une u bnai jong une u snem.
Ha ka por ba la don ka jingleit pyndem ba bun ha ka jaka ba la bat bad leh donbor ki Naxal ha Chhattisgarh, uwei na ki heh nongïalam u la pynmih ïa ka shithi kaba kyrpad ïa ki shipai ban buh noh ïa ki tiar ïaleh bad ban ïasoh bad ka kynhun ba kongsan, da kaba kdew ïa ka jingshah pynshitom beiñ ha ka kynhun namar ka jingpynbor khlem sangeh jong ki bor pahara.
Katba ki bor pahara ki nang ïoh ïa ka bor, u nongïalam ka kynhun Maoist u la kyntu ïa ki dkhot ka seng ba kin leit ban pyndem wait. Ki pulit ki la kam ïa katei ka shithi bad ki la kyrpad ïa ki Naxal ban kiar na ki kam thombor.
Nalor kane ka jingkyntu, na ka liang ki heh pulit ruh haman ki distrik bad ki bynta jong ka jylla ki la buh ka jingkyrpad ïa kito kiba don hapoh ka kynhun pyntriem ba kin leit aiti bad pyndem noh ha kane ka por ba la ailad ïa ki ba kin wan phai sha ka jingim kaba bha bad ba kin lait na kino kino ki jingeh kiba lah ban long na ki bor jong ka aiñ lada ki dang bteng ban don ha ki kynhun ba la shah ñiew beaiñ.
U Superintendent jong ki pulit ka Kanker, u Nikhil Rakhecha, ula pdiang sngewbha ïa kum katei ka shithi hashwa bad mynta ruh.
U heh pulit u la kyrpad ïa baroh ki Naxal kiba trei shitom ban ïasoh bad ka kynhun ki riewpaidbah bad ban im ka jingim kaba suk.
