Chennai, Lber:
U Myntri barim bad u MLA jong ka Karur, u V Senthil Balaji, uba la kyntait kham mynshwa ïa ki khubor ba u la shah khot hajir ha ka kynhun Central Bureau of Investigation (CBI) ha kaba ïadei bad ka jingjia ïaïuh para briew kaba la jia ha Karur, ha ka sngi Ba-ar, u la pynthikna ba u la ïoh ïa ka jingpyntip kaba la kyrpad ïa u ban leit mih hakhmat katei ka kynhun ha ka 17 tarik u Lber.
Ha ka jingthoh ha ka rynsan ‘X’ jong u ha ka sngi Ba-ar, u Senthil Balaji u la pynthikna ba la bthah ïa u ban leit hajir hakhmat ka CBI ha New Delhi ha ka 17 tarik, Lber. Da kaba pynpaw ba ki don ki khubor kiba ïapyrshah ha ki lad pathai khubor ha kaba ïadei bad ka jingkhot hajir ba la pynmih ha kaba ïadei bad kane, u Balaji u la pynpaw ba un leit hajir hakhmat jong ki bad jubab ïa ki jingkylli jong ki.
Ha ka lah sngi U Blei, haba jubab ïa ki khubor kiba la saphriang ha ki Social Media ba u la shah khot hajir ha katei ka kynhun, u Balaji u la ong ba ym shym la ai kum kata ka jingpynbna halor jong u.
Haba kylli hato u la ïoh ne em ïa ka jingkhot hajir hakhmat ka CBI ha Delhi, u la ong ba um shym la ïoh kano kano ka jingpyntip.
“Lada nga la shah khot, ngan jin da la wan mih mynta ka sngi”, u la ong haba jubab ïa ki jingkylli jong ki nongthoh khubor.
Kane ka jingjia ka wan hapdeng ka jingtohkit jong ka CBI kaba dang ïaid shakhmat halor ka jingïaïuh para briew kaba la jia ha ka jingïalang ïalap ilekshon kaba la ai jingkren da u heh ka seng Tamilaga Vettri Kazhagam (TVK) u Vijay ha Karur.
Ki la don baroh kumba 41 ngut ki briew kiba la ïap bad palat 100 ngut kiwei pat kiba la mynsaw ha ka jingïaïuh para briew ha ka jingïalap ilekshon jong u Vijay ha Velusamypuram ha Karur ha ka janmiet jong ka 27 tarik Nailur, 2025.
Shuh shuh, ka kynhun CBI ka la khot hajir ruh ïa u Vijay ban leit mih ha khmat jong ka ha ka 15 tarik u Lber hangne ha ka mukotduma jong ka jingjia ha Karur, la ïathuh ki heh sorkar ha ka sngi Ba-ar.
Ka kynhun tohkit, ka la kylli jingkylli ïa u Vijay arsien ha u bnai Kyllalyngkot, ka la khot biang ïa u Vijay ha ka 9 tarik u Lber, hynrei u la kyrpad ba dei ban pynjlan noh da 15 sngi, ki la ong.
Une u khlur ak phlim uba la kylla long u riewsaiñpyrthei u Vijay, u la kyntu ruh ba dei ban pynlong ïa ka jingtohkit ha Chennai lane ha kano kano ka ophis ha Tamil Nadu, da kaba kdew ba ki don ki jingïakynad ha ka saiñpyrthei namar ka ilekshon dorbar thaw aiñ ka ban sa wan ha kane ka jylla, ki la ong.
Mynta ka kynhun CBI ka la bthah ïa u ban leit hajir ha ka 15 tarik u Lber ha Delhi ha ka ophis treikam jong ka kynhun, ki la ong.
Ha ka khubor ba la buh ha ka rynsan ‘X’ ha ka ktien Tamil, u Balaji, u la thoh ba u thmu ban leit mih hakhmat ka kynhun CBI ha ka 17 tarik u Lber bad ban ai jingshai ha kaba ïadei bad ka jingjia ba sngewsih ha Karur.
Ka CBI ka la shimti ïa kane ka mukotduma na ka kynhun SIT hadien ka hukum jong ka Supreme Court bad ka la lum ïa ki sakhi sabut kiba ïadei bad ka jingïaïuh para briew kaba la shim ïa ka jingim jong ki briew bad pynmynsaw ïa palat 60 ngut ha ka por ba u Vijay u pynlong ïa ka jingïaid paidbah ha Karur jong ka Tamil Nadu.
Ha u bnai Risaw jong u snem ba la lah, ka kynhun bishar bahakhliehduh ka la pan na u Director jong ka CBI ban thung ïa u ophisar ba rangbah ban shimti ïa ka jingtohkit bad ka la thaw ruh ïa ka komiti peitngor ba la khlieh da u nongbishar barim ka Supreme Court u Ajay Rastogi ban buddien ïa ka jingtohkit jong ka tnad.
Ka ïingbishar kaba kynthup ïa ki nongbishar u J K Maheshwari bad N V Anjaria ki la ong ba kane ka jingïakhih paidbah ka la iehnoh ïa ka dak ha ka jingmut jingpyrkhat jong ki nongshong shnong ha kylleng ka ri.
Ka don ka jingktah kaba jur bha ha kaba ïadei bad ka jingim jong ki nongshong shnong, bad ban pyntreikam ïa ki hok ba kongsan jong ki longïing kiba la duh noh ïa kiba haïing hasem ka long kaba kongsan tam, la ong ka ïingbishar.
“Ka jingngeit bad jingshaniah jong ki paidbah ha ka jingpyntreikam ïa ka jingtohkit ka dei ban wanphai biang ha ka rukom bishar hok ïa ki nongleh kam sniew, bad kawei ka lad ban pynrung ïa kum kane ka jingshaniah ka long da kaba pynthikna ba ka jingtohkit ha kane ka mukotduma kaba mynta ka long kaba khlem liang pura, kaba laitluid bad kaba khlem shah liang,” la ong ka kynhun nongbishar.
