Raphael Warjri
Katba dang ïeng rasong ka spah pyrthei katta dang kiew skong ka khyllew ka kyreit, ka meng ka hangamei. Ka pharshi shaphang u thlen ka la urlong ha kito kiba mane ïa ka spah, wat lada dei ban pynkheiñ burom ne leh khlemakor ïa kiwei khamtam haba dei kiba duk ba rang-li. Ym tang katta, ki khun ym tip akor burom ïa la ki kmie ki kpa, ki kñi ne hynmen para lada kim don kamai ba biang ha ka longïing longsem. Ka akor burom ka la kylla long ïano ïano kiba khraw ka spah ka hajar, wat lada dei kiba dang rit ka ryta ruh. Kata ka dei ka aiñ thymmai ha ka longbriew manbriew kaba la shu thawdur hi da ki para bynriew ha ka imlang sahlang. Ka pisa ka dei ka atiar ban shakri ïa ki jingdonkam jong ki bynriew, ym dei ka kynrad ba kin mane miet la bad sngi ba yn shlei ha ka thiar lum spah jong ki. Lada ki briew ki la sngewthuh ban ñiew ïa ka pisa tang kum ka shakri ka ban sule kam ïa ki jingdawa ba donkam shisha ki bynriew katta ka la biang ban im suk im saiñ ha pyrthei. Hynrei haba don katto katne ki briew ki ba thaw dur lei longspah da ka pisa tyngka ba ka tyllong jong ki jingsniew baroh ka sei bluit ïa ka jinglong arsap arphong, ka bishni pihuiñ, ka shun ka pen, ka dom ka bitar, ka dukhi amrang, ka buhshun buhkhoh, bad kumta ter ter kiba lynsher ïa ka longbriew manbriew.
Haba ki briew ki nang ban long adkar bad sharai la ka longrynñieng da kaba pyrkhat sani shwa ban jam ïa kano kano ka lynti, wat ki mrad ruh ki tip ban ñiew burom. Katno tam lei lei para bynriew ba yn sa lah ban ñiewkor tang lada u briew ne ka briew ki nang ban ri burom ïa la ka longrynñieng bad ban ym shah teh mraw ha ka spah ka hajar, ban ym shong tynrai ka meng ka hangamei, hynrei ban theh sei tang da kaba sbun kylluid mynsiem, da kaba sngewsynei markylliang para bynriew, da ka ba ïarap kyrshan ïa kiba tlot bad tynrong lem kat la i bor ïa kiba khlaiñ ba kin dang kiew irat bad ha kata ka rukom ka jingbha suda kan kyrsoi ha ka imlang sahlang bad ki para bynriew kin kiew ryngkat ha ka longbriew manbriew ban tyngshaiñ ha ka pyrthei.
Kito ki briew kiba lah ban im ka jingim kumta, ki suk ka mynsiem bad ki dap tang da ka jingkmen suda khlem khohñioh ne pihuiñ ïano ïano. Ha kata ka rukom wat lada kyrduh ruh ki sngew pahuh, wat la dukha ruh kim bynñiaw, wat lada lanot ruh kim khuslai, namar ba ka mynsiem ka dap kyrhai tang da kiei kiei kiba bha suda. Haba shim kyllum ka long kaba eh ba ki bynriew ki lah ban im kum kata ka jingim, hynrei lada puson sani bad pyrshang, suki suki yn sa lah ban sngewthuh ïa ka jingmih kaba bha na la ka jingim lajong. Ha ka kam ka jam, ka kamai kajih ne ka khaïi pateng, lada mar mlien ban pyrkhat ha lade da kata ka jingim, ka nong kaba bha kan wan urlong hi ha ka jingim briew. Bunsien ki briew ki trei ïa ka kam lada dei ba bylla nong ban kamai kajih lane lada dei ba kheng ha ka khaïi pateng, ka jingthmu barabor ka dei ban iohnong da ka pisa tyngka namar ba la tehmraw lypa da kiwei pat ki jingpyrkhat ban siew ïa kane katai kaba donkam shimet lane kaba donkam ha la ka longïing longsem bad kumta ter ter. Ka ba kongsan ka long ba dei ban ieit ïa la ka kam bad ban khluh barabor ban pyndep la ka kamram katkum ba dawa, khlem da syntan ne leh bym suitñiew.
Ka saiñ pyrkhat kaba kongsan ka long ba yn trei hok ïa ka kam khlem da khmihlynti ïa ka pisa, namar ka nong kaba dei hok ban ïoh kan sa wan hi lada duriap ha la ka kam da ka jingieit, lmun, kmen bad suk mynsiem. Kaba trei ba ym banse tang ban ioh pisa, ka lah ban nang pyndukha shuh shuh. Ki don byllai ki nongmuna na ki briew kiba suk mynsiem ha la ka kam ba ki trei, haduh ba ka nong ka wan hi lada dei da ka pisa kum ka tulop ne kum kaba iohnong ha ka khaïi. Wei ba trei bha ïa ka kam bad leh bha ïa kiwei ki parabriew, ka bainong ka ju wan hi khlem da khmih lynti bad dei ban ngeit ha kata barabor. Kaba buh shwa ïa ka jingthmu ban kamai pisa ka pynjngut ïa ka pyrkhat bad ka kylla long kaba sniew bad pynshoi ïa ki kam buhrieh khamtam ban leh ki kam bymman. Ki briew kin ym sngewthuh ba kumno kata ka pyrkhat ka pynsniew ïa jinglong jong ki, namar ba shimet ki ju pyrkhat ba ym don ban tip ïa kaei kaei kaba ki leh buhrieh ha lade. Mian-pamian ynda la marmlien ban leh buhrieh ym lah shuh ban kylla bad ka shong tynrai syndon kata ka jinglong ban leh buhrieh da ki kam bymman. Ha kaba nyngkong ka lah ban long ba leh klet khnang, na ka klet ka lam sha ka leh klep, bad na ka klep ka poi syndon sha ka klop bad hangta ka shong tynrai ka bamsap bampong. Ka bamsap bampong ym tang ïa ka mar ne ka pisa hynrei ka suhthied ha ka pyrkhat ba ki briew kim nang shuh ban leh ïa ki kam babha ïa kiwei bad khamtam eh ïa lade. Katba nang pyrkhat bha ïa kiwei, leh bha ïa kiwei, sbun mynsiem ïa kiwei, sngewlem ïa kiwei, katta ka nong babha ka wan phai kylla sha lade.
