Srinagar, Lber:
Katkum ka jingïathuh ka tyllong khubor, la ong ba ïa u lehnoh uba la shah pynïap ha ki shipai ha ki bynta jong u Line of Control (LoC) ha ka thaiñ Nowshera jong ka Rajouri distrik jong ka Jammu & Kashmir ha ka sngi Ba-ar, la ithuh ba u dei u heh nongïalam ba hakhliehduh jong ka Lashkar jong ka kynhun ba ju pynjur ïa ka jingsiat namding.
Ka jingshah pynïap jong u ka la shah ñiew kum ka jingpynphai ïa ka nong kylliang sha ka kynhun lehnoh Lashkar bad ïa ki kam pyntriem jong ki lehnoh ha ka thaiñ Jammu.
Ha ka sngi Ba-ar, ki shipai ki la khanglad ïa ka jingthmu ban rung tuh da ki arngut ki lehnoh harud ka LoC ha ka thaiñ Jhangar jong ka Nowshera Sector ha Rajouri da kaba pynïap ïa uwei na ki nongwan rung tuh katba uwei pat u la lait phet biang.
Ki tyllong khubor ki ïathuh ba katkum ki kot ki sla kiba la ïoh kurup na ki lehnoh ba la shah pynïap bad ki jingtip jong ki riew wad bniah, la ithuh ïa utei uba la ïap kum u Hamza Yousaf, uba sah ha PoK. “Une u la rah ïa ka Identity Card kum u nong Pakistan,” ki la ong. Kane ka jingithuh ïa u ka la long naba la sakhi na ki kot donkam ba la lap na ka met jong u.
Katkum ki tyllong khubor ba la ïoh lum, la ong ba la ïoh ban kurup ïa ka jaka buh tiar siat kaba heh bha, ar tylli ki pistol kiba don saw tylli ki Magazine, lai tylli ki bom kawang kti, kawei ka mobile set, ar tylli ki sim card bad katto katne ka pisa Pakistan.
