New Delhi, Lber:
Ki la don palat 500 ngut ki nong India kiba sahkut ha Qatar la pynkynriah noh sha New Delhi bad kiwei kiwei ki jaka ha ka sngi Balang, la ong ka Indian Mission hangne, da kaba maham ïa kito kiba dang don ha katei ka ri ban ym ktah ïa kino kino ki tiar, ne ki mar bym lah ban ithuh.
Haba ai ka jingkyntu kaba la buh ha ka rynsan X, ka Indian Embassy ha Qatar ka la ong ba ka Qatar Airways ruh ka la thmu ban pynher ar tylli ki liengsuiñ sha India ha kane ka sngi Palei, hapdeng ka jingïakynad kaba dang ïai bteng ha ki thaiñ Middle East.
“Ki la don palat 500 ngut ki nong India kiba la sahkut ha Qatar ki la mih ban leit sha New Delhi bad sha kiwei pat ki bynta jong ka ri da ki liengsuiñ Qatar Airways ha ka 11 tarik, Lber,” la ong ka tyllong khubor.
Ka mission ka la ong ba ki lai tylli ki rukom ai jingïarap jong ka kiba treikam man ka sngi ki long kiba lah ban ïarap ïa ki paidbah nong India ban jubab ïa kino kino ki jingkylli, bad bynrap ba ka la ju ai jingmut kyrpang ïa ka jingpynbiang kloi ïa ki passport na ka bynta ki nong India.
“Namar ka jinglong jingman mynta, ngi plie ha baroh ki sngi jong ka taïew ban shim ïa ki aplikeshon passport. Ïa ki passport Tatkal la ai hapoh 1-2 sngi,” la ong ka khubor.
Ka la kyntu ïa ki nongshong shnong jong ka ri India ban “phikir bad ban shimkhia bha ïa ki jingpynbna bad ki khubor maham ba la pynmih da ki lad pathai khubor ba thikna bad ban bud ïa ki kyndon kiba donkam.
“La ai jingmut ïa baroh ban ym leit shajan kino kino ki tiar ki bym lah ban ithuh, ki tdem, ne ki jingtwa. Sngewbha pyntip mardor ïa ki da kaba phone ha u 999,” ka la bynrap.
Ka jingïakynad ha Middle East ka dang ïai bteng hadien ka jinghiar thma jong ka US bad ka Israel ïa ka Iran naduh ka 28 tarik u Rymphang.
