Tura, Lber 15
Ki nongshong shnong ba shong ba sah ha ki jaka thor ka Ri-lum Garo ki la pan jingshai na ki nongïalam ka BJP halor ki jingkren ba dang shen jong ki da kaba kynnoh ba bun na ki nongshong shnong jong katei ka thaiñ ki dei na ka ri ba marjan – ka Bangladesh.
Ha ka kyrwoh khubor na ki nongshong shnong, ki nongshong shnong ki la ñiew ïa kane ka jingkren kum ka bym don jingkitkhlieh bad kaba ïalam bakla.
Dang shen, ka thaiñ ka la shah ktah ha ka jingkulmar halor ka jingïashim bynta jong ki bym dei ‘riewlum ha ka ilekshon GHADC, ha kaba ka Ri-lum Garo kam pat lait na ka korphiw haduh mynta. Ki bor pahara ki ïai bteng ban don ha katei ka thaiñ ban khanglad ïa kaei kaba la jia ha kine ki 3 sngi ba la dep, kata hapdeng ka 9-11 tarik u Lber.
“Ngi kyntu jur ïa ki nongïalam ka BJP ba kin pynshai ïa ki jingkren jong ki da kaba kam ba kiba bun ki Muslim kiba kren Bengali kiba shong ba sah ha ki jaka thor kiba hap hapoh ka GHADC ki dei ki “Bangladeshi”. Kum kine ki jingkynnoh ki long ki bym don jingkitkhlieh bad kiba ïalam bakla,” la ong ka kyrwoh khubor.
Ki nongshong shnong ki la kyrpad ruh ïa ka seng ba kan kdew beit thik hangno ki briew na Bangladesh ki don ha ki jaka thor.
“Lada kum kine ki jingkynnoh ki mih, ki dei ban kdew shai ïa ki shnong bad ki jaka ban ïa kaba kynnoh ïa ka imlang-sahlang baroh kawei. Ka long kaba sngewsih ba kum kine ki jingkren ki mih ha ka por ba ka ilekshon ka la jan. Kane ka paw kum ka jingpyrshang ban ïalam bakla ïa ka imlang-sahlang kaba bun paid bad ban thaw ïa ka jingïakynad ka bym donkam satia hapdeng ki jaidbynriew na bynta ka jingmyntoi saiñ pyrthei. Ki seng saiñ pyrthei ki dei ban pynleit jingmut ha ka roi ka par bad ki mat kiba donkam shisha ha ka jaka ban saphriang ïa ka jingsuba bad ka jingïaphiah,” ki la ong.
“Ngi kwah ban pynpaw shai ba ngi burom ïa ka jingthmu jong ka GHADC kaba don ban ïada ïa ka khyndew ka shyiap, ki khlaw ki btap, ka kolshor, bad ki hok jong ki ‘riewlum. Ngim don jingpyrshah eiei ïa ki lad jingïada kiba ïada ïa ki jingmyntoi jong ka jaidbynriew ‘riewlum. Hynrei, ki nongshong shnong ba shisha kiba la shong ba sah ha ki jaka thor naduh ki por jong ka jinglaitluid kum ki longïing bad ki kpa tymmen jong ngi, ym dei ban shah kynnoh kum ki nongwei. Bun na ngi, ngi la im-suk im-saiñ hangne la bun pateng bad ngi long ki nongshong shnong ba dei hok jong kane ka ri,” la kam ka kyrwoh khubor.
Ki nongshong shnong ki la khot sngewbha shuh-shuh ïa ki nongïalam ka BJP ban wan jngoh ïa ki jaka thor bad ban pynithuh beit thik mano kita ba ki kam ba ki dei ki nong Bangladesh bad hangno ki don, ha ka jaka ban kren kyllum kaba pynsniew pat ïa ka jingïa im-suk im-saiñ ha ka imlang sahlang.
“Ngi kyrpad ïa baroh ki nongïalam ba don ka jingkitkhlieh ban ym ïalam bakla ïa ki paidbah ka Ri-lum Garo ne ban thaw ïa ka jingïapher jingmut hapdeng ki jaidbynriew bapher-bapher. Ki paidbah jong ki jaka thor ki ngeit ha ka jingïa im-suk im-saiñ bad ka jingburom markylliang hapdeng baroh ki jaidbynriew. To ngin ïatreilang ban pynneh ïa ka suk ka saiñ, ka jingïatylli, bad ka hok na ka bynta baroh ki nongshong shnong kiba dei hok” la bynrap shuh-shuh ka kyrwoh khubor.
