Aizawl, Lber:
Ka sorkar Mizoram ka la pynlut T.685.93 klur ban thied bording na shabar ha une u snem mang tyngka ba mynta, la pyntip u Myntri ka tnad bording u F Rodingliana sha ka ïing dorbar jong ka jylla ha ka 11 tarik u Lber.
Haba jubab ïa ka jingkylli jong u K Lalawmdawna jong ka Mizo National Front (MNF), u Myntri u la ong ba ka jingpynmih bording hapoh ka jylla na baroh ar ki tyllong bording bad ka bor sngi ka la poi tang 41 million unit hapdeng u Kyllalyngkot bad Nohprah, 2026.
U Rodingliana u la ong ba ka sorkar ka la lum T.245.33 klur kum ka khajna na ki nongpyndonkam bording ha kane kajuh ka por. Hynrei u la kdew ba ka jinglut ban thied bording na shabar ka jylla ka kham heh shibun ban ïa ka jingmih na ki nongpyndonkam bording.
Wat hapdeng ka jingduna, u Myntri u la ong ba ka jylla ka la lah ban pynneh ïa ka Balance Sheet kaba khuid bad ban pynkhuid ïa ka ram kaba ïadei bad ka jingthied bording.
Ki heh sorkar ki la pyntip ruh sha ka ïing dorbar ba ka sorkar ka dang pyrshang beit ban ïoh ïa ka jinglah ban pyndap ïalade ha ka jingpynmih bording. Ha u bnai Kyllalyngkot mynta u snem, u Myntri Rangbah ka jylla u Lalduhoma u la buh ïa u mawnongrim na ka bynta ka projek bording rit Tuirini kaba shongdor T.76.98 klur ha Aizawl distrik, ka ban don ka bor pynmih bording kaba 24 MW.
Ha kajuh ka por, ka Detailed Project Report (DPR) na ka bynta ka projek pynmih bor ding Tuivai kaba la thmu ban shna 132 MW ha Saitual distrik hajan khappud ka Manipur la pyndep, bad la khmih lynti ba ka DPR na ka bynta ka Tlawng hydro electric projek hajan Aizawl la khmih lynti ban pyndep noh ha u Nailur mynta u snem.
