U Nongsaiñ Hima, 1979
U ïaïong u dei u bnai ha kaba ka pyrthei ka mariang kah kup biang sa shisien da ka jingjyrngam iong jong ki sla kiba la dang shu lah khie na ka jingiap shipor bad jingtlor jong ka Tlang. Une u dei u bnai jong ka jingsan bad jingkhmih lynti. Ka jingsan, namar dei ha une u bnai ba ki sla dieng sla siej, ka jingthung bad jyntep ki la san. U dei u bnai jong ka jignsan namar ha une u bnai la pynkhreh ïa ka jingphuh syntiew jong kiba bun ki dieng soh dieng pai.Kumta u long u bnai uba da donkam eh. Namar khlem u ïaïong ngin ym lah ban ioh ïa u Jymmang u bnai jong ki syntiew ki skud bad u soh u pai.
U long u bnai jong ka jingkhmih lynti namar dei ha une u bnai ba ki dieng ki siej, ki phlang ki syntiew ki ap khmih lynti hir hir ïa ka jingwan u slap ban pyntngen ïa ki. Dei ha une u bnai ba don ka jingrykhiang kaba jur bad kane ka jingrkhiang ka don la ka jingmyntoi namar dei ha kane ka por ba ïa ka bor jong u jynthung la lah ban tip ba haduh katno u lah ban ïeng dalade. Dei ha une u bnai ba ka lyer ruh ka kawut bad kane ruh ka pynkhih ïa ki thied ki jaw jong ki jynthung bad uto uba lah ban ïeng u la ïeng bad im bad uto u bym lah ban kyrshan te u la iap. Ha ka pyrthei jong ki mrad ruh kumjuh, ki don hi la ka aiom ba kin trei, kin lum kin lang la ka bam ha ka por ba biang khnang ba bsa ïalade ha kata ka aiom ba kim lah wat ban mih na la skum ban leit wad jingbam. Katba sha ba phi pynphai ïa la ki khmat phin iohi ïa kane ka jingpyndep hok ïa la ka kamram ha la ka aiom.
Kumjuh ruh ka long ha ka jingim u briew, don la ki aiom aiom. Khlem kine ki aiom u briew un ym lah ban long u briew. Don ka aiom jong ka jinglong khynnah ha pnah ka kmie, don ka aiom ba u khynnah u la mareh mastieh, don ka aiom ba u la siaw bad pynshang la ki khmat, don ka aiom jong ka jinglong rangbah ba ula dei ban rai ïa ka lawei jong u, wan ruh ka aiom jong ka jingkit ïa ka lyngkor bad khadduh ïa wai wan ka aiom jong ka jinglong tymmen. Haba kumta hato kam la dei ba manla uwei pa uwei un ïaleh ban pynlut bha ïa la ka aiom ha ka por ba ka wan kumba ki jynthung jyntep ki pynleit bha ïa ka aiom ha ka jingiaid lyngba jong ki sha ka jinglong rangbah bad jinglong san jong ki ?
Kan long ka jingbieit kaba khraw lada mangi ngim pynleit bha ïa la ki aiom katkum ka jingwan jong ki namar ki minit ne ki khyllipmat kiba her noh sha bymjukut kin ym wan phai shuh bad kumta ngin shu sah ha ka jinglong raj bad ngin lyngkot satdam ha ka jinglong jingim jong ngi.
Une u bnai ïaïong don shibun ki jinghikai bad ai ïa ngi. To ngin ïa peit pyrman ia ka mariang bad ki kam jong ka bad kumno ba ka pyrthei jong ki jynthung jyntep ki pdiang ïa une u bnai ban pyndep hok ïa la ka aiom.
