Tehran, Lber:
Ka Iran ha ka Sngi Palei, ka la smai ba kan kput ïa ka United States bad ba kan pyn babe ïa ka US namar ki jingleh don bor jongka bad ka la byrngem ruh ba kan pyni da ka bor halor ka ‘Strait of Hormuz’, namar ki jingleh jong ka US kaba la pynkiew dor ïa ka umphniang ha kine ki sngi.
Ka tnat International Energy Agency ka la maham ba ka thma Middle East ha kane ka sien, ka lah ban long ka jingma bad jingduh nong kaba khraw ïa ka pyrthei baroh kawei khamtam ïa ka iew khaïi umphniang ha ka pyrthei. Hynrei u President ka US- u Donald Trump, u la pynbna ba ka jingjop ïa ka thma pyrshah ïa ka Iran, ka long kaba kham kongsan, ban ïa ka dor jong ka umphniang ne kano- kano kawei pat ka jingduhnong. U Trump u la mad ïa ka jingeh kaba jur ha ka saiñ hima sima katba ka jinghiar dor jong ka ïoh ka kot ha ka pyrthei na ka jingeh ka la nang kiew, bad u la ai ïa ki khubor kiba ïapher ba lano ka jingïakhih jong ka US ka lah ban kut noh.
Kane ka jingkren jong u ka long hadien ba u nongïalam ba ha khlieh duh ba thymmai jong ka Iran, u Mojtaba Khamenei, u la pynmih ïa ka jingkren pyrshah — kaba nyngkong eh jong u naduh ba la thung ïa u ha ka Sngi U Blei ba la dep hadien ba u kpa jong u bad u nongïalam ba ha shuwa jong u, u Ali Khamenei, u la khlad noh ha ka jingïakhih. U Mojtaba Khamenei, uba la ïathuh ba u la mynsaw, um pat mih paidbah, naduh ba u shah jied, bad ïa ka khubor jong u, kaba khot ban siew kylliang, la pule da u nongpynbna ha ka telebishon jong ka sorkar jylla.
“Ka lever ban khanglad ïa ka duriaw Hormuz dei ban pyndonkam thikna,” ong u Khamenei shaphang ka lynti um kaba shi bynta na ka saw bynta jong ka khaii umphniang ha duriaw jong ka pyrthei ka ju ïaid lyngba.
Kane ka duriaw, kaba ju don ruh shi bynta na ka san bynta jong ka jingpynbiang ïa ka lyer um (LNG) ha ka pyrthei, ka don harud ka Iran bad ka heh tang 54 kilomitar (34 mail) ha ka jaka kaba rit tam jong ka.
