Shillong, Lber 16
U Martin Odegaard bad u Jurrien Timber kin duh shim bynta ïa ka Arsenal ha ka Champions League pyrshah ïa ka Bayer Leverkusen.
Ha ka wat kaba nyngkong jong ka pre-quarter final, ka Arsenal ka la ïakhaid mar 1-1 kol ha Germany ha ka taïew ba la lah bad ha kane ka kynti kaba mynta ka la khmih lynti ban ïalehkai bha khnang ban pynthikna ban ïoh rung sha ka quarter-final ha ka jingïakhun ka ban long ha north London ha ka sngi Balang.
Kane ka kynhun kan hap ban ïakhun khlem u Odegaard, uba dang bteng ha ka jingmynsaw ha ka kjat.
Utei u kapten ka Arsenal, u la ïalehkai tang shisien, naduh ka 12 tarik u Rymphang, ha kaba u la ngat ha katei ka jingmynsaw ha ka jingïakhun pyrshah ïa ka Brentford.
U Odegaard u la wanphai biang shipor na kaba shong ben ha ka jingïakhun pyrshah ïa ka Tottenham ha ka taïew ba la lah, hynrei um pat shym la koit pura bad um shym la ïoh mih madan shuh naduh katei ka por.
Katba u Timber u dei u rangïalehkai uba la ju mih madan na ka bynta ki jingïalehkai ka Arsenal mynta ka samoi, hynrei ha kane ka kynti kaba mynta un duh ïalehkai na ka daw ka jingmynsaw.
Utei u rangïalehkai u la ngat ha ka jingmynsaw ha ka kjat ha ka jingjop da 2-0 kol ïa ka Everton ha ka sngi Saitjaiñ.
U Timber u la pyrshang ban bteng hynrei u la ai dak ban shong noh hadien 20 minit bad la hap ban pynshong noh ïa u shwa ban kut ka por.
Ym shym la don uwei ruh na ki rangïalehkai uba la ïashim bynta ha ka jingïalehkai kilanmet ha London Colney ha ka lah sngi U Blei bad mynta u coach ka Arsenal u Mikel Arteta u la pynthikna ba kin ym lah ban ïakhun pyrshah ïa ka Leverkusen.
Hynrei na ka liang u Leandro Trossard un don bynta lang bad ka kynhun hadien ba la kut ka jingkilanmet ha ka lah sngi U BLei. Une u rangïalehkai na Belgium u la mad ïa ka jingmynsaw kaba malu mala ha ka jingïakhun pyrshah ïa ka Mansfield ha ka FA Cup ha ka taïew ba la dep kaba la pynlong ïa u ban ym lah ban ïalehkai ha ki ar tylli ki jingïalehkai ba la dep.
“Baroh ar ngut, u Odegaard bad u Timber kin ym lah ban shim bynta,” la ong u Arteta ha ka jingïalang bad ki nongthoh khubor. “U Trossard u biang bad u lah ban ïadon bynta lang bad ka kynhun.”
U Max Dowman u la don bynta ha ka jingkilanmet jong ka kynhun ha ka step jong ka lah sngi U Blei. Katba ka Arsenal kan duh ruh ïa u Mikel Merino hadien ba u la mynsaw ha ki bynta jong ka kjat.
