Bengaluru, Lber:
Ha kine ki hynriew snem ba la dep, la don 468 tylli ki jingshah byrngem pynbthei bom bad ki email ha kylleng ka jylla, hynrei la ithuh ïa ki nongleh kam sniew tang ha ki 14 tylli ki jingjia.
Kiba bun ki jingbyrngem ki long sha ki skul bad ki kolej, ki ïingbishar, ki hotel, ki temple, ki kad liengsuiñ, ki jaka ïeng rel, ki Embassy bad kiwei kiwei ki jaka paidbah kiba bun briew. Ïa kane ka jingtip la ai da u Myntri ka tnat ki kam pohïing ka jylla u G Parameshwara ha ka jingthoh ba u jubab ïa ka jingkylli ba la wanrah da u MLC ka Congress u Madhu G Madegowda hapoh ka Council.
La pynlong ïa ki jingpeit bniah hadien man la ka jingshah byrngem ne email, hynrei ym shym la lap ïa ki tiar pynbthei ha kano kano ka jaka.
Ki kynhun na ka Bomb Detection and Disposal Squad bad ka Anti-Sabotage units ki la peit bniah bha ïa ki jaka ba la pyntip ïa ki jingbyrngem bad pynthikna ba ym shym la don ki bom bad la kheiñ ïa ki jingbyrngem kum ki jingbyrngem thok.
Napdeng baroh ki thaiñ, ka Bengaluru ka la ïoh ïa ka jingbun tam ki jingkhot byrngem bom thok. Ki jingtip ki pyni ba 318 tylli kum kine ki jingkhot la ïoh pdiang ha Bengaluru ha kine ki hynriew snem ba ladep. Kiwei pat ki jaka kiba la ïathuh ba ki don ki jingbyrngem ki kynthup ïa 34 ngut ha Mangaluru bad Mysuru, 10 ngut ha Bengaluru Rural, 9 ngut ha Hassan, 7 ngut ha Hubballi, 5 ngut ha Bengaluru South, Karwar bad Kalaburagi bad 4 ngut ha Mandya distrik.
Ha u snem 2023, tang ha Bengaluru, ka la pyntip ba ki don 144 tylli ki jingkhot byrngem bom thok, kaba long kaba heh tam, kaba la ïoh jingtip ha ka shisnem da kano kano ka nongbah ha ka Jylla, ha kine ki hynriew snem.
Ki jingtohkit ki la pynlong ban ithuh ïa ki nongleh kam sniew ha ki katto katne ki case. Ha Dakshina Kannada distrik, la lap ïa ki nongleh kam sniew ha ki ar tylli ki khep ha u snem 2020, kawei ha u snem 2023, ar tylli ha u snem 2024 bad lai tylli ha u snem 2025. Ha Uttara Kannada distrik, la lap ïa ki nongleh kam sniew ha kawei kawei ka khep ha u snem 2023 bad 2025.
Nalor kata, uwei u nongshah kynnoh la ithuh ha KGF ha u snem 2024, katba kawei kawei ka mukotduma la pynbeit ha Uttara Kannada, Ballari, nongbah Mysuru bad ki distrik Kalaburagi ha u snem 2025.
Ym shym la don kano kano ka jingkhot byrngem bom ha ki jaka buh um ba heh ha ka jylla, kynthup ïa ka dam Krishna Raja Sagaram.
U myntri kam pohïing u la pynpaw ba ym shym la don kum kine ki jingjia namar ba la buh ïa ki lad jingïada kiba biang ha ki jaka ba kongsan ha kylleng ki jaka pyllang bad den um.
