Ka Mawlai Syllai Kariah ka long kawei na ki kyntoit shnong kaba hap hapoh ka Mawlai Town Durbar (MTD). Ka Mawlai Syllai Kariah ka la don la ka jong ka rukom pynïaid shnong pynïaid thaw naduh ba la phiah na ka Mawlai Nonglum ka la kynjoh kumba 62 snem eiei. Ka la ioh la u jong u Rangbah shnong uba pynïaid ïa ka shnong ka thaw. U Rangbah shnong uba nyngkong eh u dei u Bah K. M. Rani ba la khlad. U Rangbah shnong uba ar u dei u Bah K.Nongkynrih ba la khlad, ba ju khot ieid i Padeng. U Rangbah shnong uba lai u dei u Bah C. B. Iawphniaw bad u Rangbah shnong uba saw u dei u Bah C. Shullai.
Naduh ba la ioh la ka jong ka bor pynïaid shnong la jied ïa u Rangbah shnong da ki nongshong shnong. Bad u pynïaid ïa ka shnong 5 snem ka samoi ba u bat kum u Rangbah shnong. Hadien man la ka san snem hap pynlong ban jied pynthymmai biang ïa u Rangbah shnong. Namar ïa u Rangbah shnong la jied da ki nongshong shnong kum ka rukom pateng la pateng. Hadien ba la dep jied da ki nongshong shnong, ki sa phah ha u Syiem ba un ai Sanad ban pynskhem ïa ka jinglong Rangbah shnong. Hynrei mynta une u snem 2025, u Bah C. Shullai uba long Rangbah shnong u la ïehnoh (Resign) na ka kam Rangbah shnong. Kumta kat kum ka rukom pynïaid shnong ha ka jingshisha la dei ban khot pynlong da ka Dorbar shnong ban jied thymmai ia u Rangbah shnong ba la resain. Pynban ka long da khongpong, kane ka Executive Committee kaba ïalam i Bah C. Shullai ba la resaiñ ka la leit kyrpad kyrpon ïa u Syiem ka hima ban ithuh Rangbah shnong ïa u Assistant Rangbah shnong khlem da khot pynlong Dorbar ban jeid thymmai ïa u Rangbah shnong kum ka rukom pynïaid shnong.
Te ha ka 17.01.2026, u Assistant Rangbah Shnong ula ïathuh bad pynïaid hi ha ka Dorbar ai Report treikam bad ai jingkheiñ jingdiah jong ka shnong ba u la ioh Sanad na u Syiem ka hima bad mynta ym donkam ban jied Rangbah shnong thymmai phi dei ban pynskhem beit ïa u kum u Rangbah shnong ba pura. Kane keiñ ka la pynlyngngoh ngain ïa ki nongshong shnong ka Mawlai Syllai Kariah. Te mynta ka Mawlai Syllai Kariah ka la ioh ïa u Rangbah shnong ba thung da u Syiem ka Hima khlem donkam shuh ban pynlong ban jied na ki nongshong shnong.
Te kane ka rukom leh shane kan ïalam namar kan pynduh noh ïa ka rukom jied da ki nongshong shnong ïa u Rangbah shnong. Hato kane kam dei ba knieh noh ia ka hok ki nongshong shnong ban jied ïa u Rangbah shnong ym tang ha Mawlai Syllai Kariah ioh ruh ban leh kumjuh ha kiwei kiwei ki shnong ruh ? Bad dei ban jied noh beit na ka liang u Syiem ïa ki Rangbah shnong baroh? Kane ka long ka jingkylli bad nga sngew ba ngam lah khlem da pynpaw ïa ka jingshisha ba ïa u Rangbah shnong ka Mawlai Syllai Kariah mynta la thung bad ithuh da u Syiem Mylliem ym na ka liang u paidbah nongshong shnong.
C. B. Iawphniaw
