Jerusalem, Lber:
U Myntri Rangbah-duh ka Israel, u Benjamin Netanyahu, ha kine ki khyndiat sngi ba la dep, u la ong ba ka jingleit thombor jong ka Israel, ka la ioh ban shim ïa ka jingim jong uwei u stad saïan ba heh duh jong ka Iran bad ïa kiwei de ki katto- katne ngut ki heh jong ka Iran.
Haba ai jingkren ha ka miet Sngi Palei, u Netanyahu u la kren pynrem ïa u nongialam ba thymmai jong ka Iran, u Ayatollah Mojtaba Khamenei, kum u ksew jong ka tnat shipai ka Iran, u bym lah ban mih pyrthei hakhmat ki paidbah. Kumta, u Netanyahu u la ong ba ki paidbah nong Iran ki la dei mynta ban ioh mad ia ka jingim kaba laitluid bad u la ong ruh ba ka Israel ka long ryngkat badki. Namarkata, kim dei ban khuslai lada ka Israel ka la pynkhyllem noh ia ki nongialam jongki, naba ka lawei kaba kham bha ka dang ap na ka bynta jongki. “Hynrei baroh ka shong ha phi. Ka shong ha ki kti jong phi,” u la ong.
Ha kajuh ka por, u nongïalam ba ha khlieh duh ba thymmai jong ka Iran, uba rieh, u la kular ban ïai bteng ban thombor ïa ki ri Arab jong ka Gulf bad ban pyndonkam ïa ka jingkhang kaba treikam bha jong ka Strait Hormuz kaba donkam bha kum ka lad pyrshah ïa ka America bad ka Israel. Ka dei ka jingkren paidbah kaba nyngkong eh jong u naduh ba la jied ia u ban shimti ia u kpa jong u, uba la shah pyniap ha ka jingshah thombor jong ki Israel.U nongïalam ba ha khlieh duh jong ka ri, u Ayatollah Mojtaba Khamenei, 56 snem ka rta, uba ka Israel, ka suba ba u la mynsaw ha ka jingsiat ba sdang jong ka thma, um shym la paw paidbah satia naduh katei ka por. Ha ka jingpynbna ba la pule da u nongpynbna khubor jong ka TV jong ka jylla, u la kular ban siew kylliang ia kito kiba la shah pyniap ha ka thma, kynthup ha ka jingiakhih ha kawei ka skul kaba la pyniap palat 165 ngut ki briew.
Ka jingpynbna ka la pyni ia ka jingkwah ban bteng ia ka thma kaba la pynthut ia ka jingpynbiang bording ha ka pyrthei, ka jingleit jingwan shabar ri bad ka jingshngain kaba iadei kaba ki ri Arab jong ka Gulf ki ioh. Ka jinghiar thma ba khlem sangeh jong ka Iran ïa ka leit ka wan jong ki lieng bad ki jingtei jong ka bor ding ha Persian Gulf kham mynshwa ka la pynphai biang ïa ka dor jong ka umphniang sha ka $100 shi barel.
