Tura, Lber 16
U MDC barim ka Balachanda Constituency u Sofiur Rahman u la shah kem noh ha ki pulit ha ka step phyrngap jong ka sngi Nyngkong halor ka jingjia ïakynad pher jaidbynriew kaba la jia ha ri-lum Garo.
Katkum ka khubor na ki pulit, ïa u Rahman la leit kem na ïing ha ka por 1 baje mynstep na New Bhaitbari, kaba hap hapoh ka thanad Rajabala, West Garo Hills District. La leit kem ïa u da ka kynhun Special Team na thanad Tura, kaba la pynthikna ruh da u Superintendent of Police ka West Garo Hills, Abraham T Sangma.
U SP u ïathuh ba ka jingkem ka dei halor ka jingkynnoh ba u dei ma u, uba kynshoit bad pynshit ba ka sa lam sha ka jingïakynad pher jaidbynriew ha ka thaiñ ri-lum Garo.
Ki pulit ki la ong ba ki jingthoh ha ki rynsan social media bala kynnoh ba dei jong u Rehman, ki dei kiba nang aiding ïa ka jingïakynad pher jaidbynriew ha ka thaiñ. Ïa kine ki jingthoh la pynphriang kylleng ki jaka bad ngeit ba ki dei kiba nang aiding ïa ka jinglong jingman kaba lam sha ki jingkulmar bad jingïaumsnam ha ki katto katne ki jaka ka ri-lum Garo.
Ha kajuh ka por, kila don ruh bun ki ejahar ba la mudui pyrshah ïa u Rahman bad ïa u MLA barim SG Estamur Mominin, ba kynnoh ba kila kren pynshit bad aiding ïa ki paidbah, kaba lam sha ka jingïakynad jaidbynriew ha ka thaiñ.
