New Delhi, Lber:
U Symbud Myntri Rangbah jong ka Karnataka, u DK Shivakumar, ha ka sngi U Blei, u la kynnoh ba ka seng BJP, ka la pyrshang ban pynlong ïa ka jingthied ïa ki MLA jong ka seng Congress ha Odisha, kiba sah ha kawei ka jaka sahkai pyngngad kaba don ha ki bynta ba marjan bad ka Bengaluru, bad ba arngut na kine ki briew, kiba la shah kem, ki la phla ba ki la pyrshang ban pynlong ïa ka “Operation Lotus”.
Haba kren sha ki lad pathai khubor hangne, u Shivakumar, uba dei ruh u heh jong ka seng Congress ha ka jylla, u la ïathuh ba saw ngut ki briew ki la wan na Odisha bad ki la buh kamra da ka jingïarap jong uwei u briew na katei ka thaiï uba kyrteng u Suresh.
U la pynpaw ba ki la rung shapoh ka jaka sah pyngngad, ha kaba ki la don mynta kumba 8 ngut ki MLA jong ka Congress kiba dang sah ha kane ka jaka, bad ki la ïakynduh ïa uwei na ki nongthaw aiñ ha ka por mynstep, da kaba tyrwa ban siew T.5 klur na ka bynta kawei ka vote.
Katkum ka jingong u Shivakumar, ki la wanrah ar tylli ki Cheque na ka liang ka BJP, hynrei ki MLA kim treh ban pdiang. U la bynrap ruh ba arngut na ki briew kiba wan thied MLA ki la lait phet, katba ki arngut kiwei pat ki la shah kem.
U la ïathuh shuh shuh ba kiba shah kynnoh ki la kam ba ki wan na ka bynta kajuh ka jingthmu. La ujor ejahar, bad ki pulit ki dang pynlong ïa ka jingtohkit jong ki katkum ka aiñ. U Shivakumar u la kynnoh ba ïa ka “Operation Lotus” la leh da ki nongïalam ka BJP.
U la ong ruh ba ïa ki jingtip ba bniah halor kane ka jingjia yn sa ïasam da ki nongïalam ka seng kham hadien.
U la kdew ba u briew uba la buh ïa katei ka hotel online la ïathuh ba u dei na ka thaiñ Byatarayanapura kaba don ha Bengaluru.
U Shivakumar u la pynpaw ba ki ba shah kynnoh ki la ïakynduh ïa ki MLA ha ka por mynstep bad pynthikna ïa ki ban ai pisa mar T.5 klur. Hynrei ki MLA ki la kyntait ïa ka jingtyrwa ban thied briew, bad la kurup noh ïa ki cheque ba la wanrah da kiba shah kynnoh.
Haba jubab ïa ka jingkylli halor ka ilekshon shiteng samoi ban wan na ka bynta ar tylli ki jaka ha Karnataka, u Shivakumar u la ong ba ka seng ka la ïoh ïa ki kaiphod na ki ar tylli ki Assembly konstitwensi bad ka don ka jingkyrmen ban jop ïa ki. U la bynrap da kaba ong ba ïa ki kyrtong shen yn sa pynbna da ki heh nongïalam jong ka seng.
U Ashok Kumar Das, Deputy Leader jong ka Congress Legislature Party ha Odisha, u la ujor sha ki pulit Bidadi ha Ramanagar distrik, da kaba kynnoh ba saw ngut ki briew ki la pyrshang ban ai pisa tuh ïa ki MLA ka Congress na Odisha kiba sah mynta ha Bengaluru hashwa ka ilekshon Rajya Sabha kaba dei ban long ha ka 16 tarik, Lber.
Ha ka jingujor jong u sha u Station House Officer jong ka jaka treikam jong ki pulit ha Bidadi, u Das u la pynpaw ba ka jingsyier halor ka jingpyrshang ban pynkhih ne ban thombor ïa ki MLA ka Congress, kane ka la mih hadien ba ka sorkar BJP kaba synshar ha Odisha ka la pynïeng kyrtong biang na ka bynta ka ilekshon Rajya Sabha.
U la ong ba, halor kitei ki jingeh bad ban pynthikna ïa ka jingshngaiñ jong ki nongthaw aiñ, 8 ngut ki MLA ka Congress na Odisha ki la poi sha Bengaluru bad ki la sahkut ha katei ka nongbah naduh ka 12 tarik u Lber.
Katkum ka jingujor, saw ngut ki briew ki bym lah ban ithuh ki la leit sha ki katto katne ki MLA ha ka sngi U Blei bad la kynnoh ba ki la pyrshang ban ai pisa da kaba tyrwa da ki klur tyngka uwei pa uwei kum ka jingsiew kylliang ïa ka jingthep vote kaba kyrshan ïa uwei u kyrtong ha ka ilekshon Rajya Sabha.
U Das u la kynnoh ba haba ki MLA ki la kyntait ïa katei ka jingtyrwa, kine ki runar ki la byrngem ban pynïap ïa ki lada ki wan phai biang sha Odisha. U la pynpaw ruh ba kiba shah kynnoh ki la pyndonkam da ki ktien kiba sniew bad kiba jakhlia pyrshah ïa ki nongthaw aiñ.
Ki briew kiba la paw kyrteng ha ka jingshah mudui ki long u Birendra Prasad, Suresh, Ajit Kumar Sahu,bad u Simachal Mohakud.
U Das u la kyrpad ïa ki pulit ba kin leh ïa kaba donkam pyrshah ïa kiba la shah kynnoh katkum ka aiñ.
La khmih lynti ba ki pulit kin khmih bniah ïa kane ka jingujor bad sdang ïa ka jingtohkit kaba bniah halor kane ka kam.
