Shillong, Lber 16
U MLA ka United Democratic Party (UDP) bad nongaibuit ka tnat Social Welfare Bah Paul Lyngdoh ha ka 13 tarik Lber u la pynskhem ïa ka Village Defence Party (VDP) jong ka Dorbar Shnong Nongsohphoh, Upper Mawprem bad kyntu ruh ïa kiwei ki Dorbar Shnong kiba don ha West Shillong Constituency ban thaw ïa ki VDP.
“Kane ka dei ka por ha kaba ngi ïashim bynta ban pyni, ba kam pat biang tang ban don u nongïalam namar u nongïalam ruh u donkam ïa ka kynhun bad phi dei kata ka kynhun” ong u Bah Paul.
Haba ban jur ïa ki lai snem jong u kum u MLA jong ka West Shillong, u Bah Paul u ai burom ïa ka jingkut jingmut jong ki nongshong shnong ban ïakhun pyrshah ïa u drok bad ki jingdih buaid.
“Haba don ka jingkut jingmut kaba skhem na ka liang jong phi, ngin ym don jingeh ban weng ban rat dyngkhong ïa ki kam sniew ha kane ka shnong ka jong ngi” ula ong.
U Bah Paul u la pynpaw ba bunsien ki nongïalam shnong ki ju ïakynduh ïa u ban ïa mir jingmut haba ïadei ka jingjyllei u drok hapoh shnong, ha kaba u la kular ruh ban leh eiei, hynrei kaba sngewtynnad ka long ba ka shnong ka la lah ban pynthikna ba ki katto katne ki nongkhaïi drok kiba la pawbha hapoh jong ka shnong, ki la don ha ki kti jong ka aiñ bad ha ka jingpynngat ïa ki kyndon jong ka Narcotic Drugs and Psychotropic Substances Act (NDPS).
U Bah Paul u la kdew ba ha ka jingïakhun ki nongïalam shnong ki la poi ha ka jingeh, ha kaba ki nongïalam shnong ki shah ujor FIR, ki hap ban leit hajir ha Ïingbishar, hynrei kane ka jingïaishah jong ki ka la ïalam lynti ïa ki mynta ban long ka kynhun ba la don ka jingïadei bad ka tnad Sorkar ka Meghalaya Police, kaba ai bor bad kaba ai jingshngaiñ ïa ki ban trei na ka bynta ka bha ka miat hapoh jong ka shnong ka thaw.
“Haba phi dei ki VDP, phi pynthikna ïa ka jingshngaiñ bad jingbit jingbiang jong ki ïing ki sem jong phi, jong ki khun ki kti jong phi, kam dei tang ka kamram jong ki pulit, hynrei ka dei ka kamram jong uwei pa uwei u nongshong shnong,” la ong u Bah Paul.
U Bah Paul ula kdew ba ka neighbourhood?watch jong ka New York ka long kum ka nuksa ïa ka VDP ban ïada ïa ki Shnong ha Mawprem bad pynkynmaw ïa ki nongshong shnong ba ka VDP Mawprem kham mynshwa ka la ïarap ban weng ïa ka jingjur ka jingdie kyiad be-aiñ hapoh ka shnong.
U la kyntu ïa kiwei pat ki Dorbar Shnong kiba don ha ka West Shillong Constituency ban thaw ïa ki VDP, da kaba kular ïa ka jingkyrshan na ka tnad Social Welfare bad ka DREAM Project.
Ha kane ka jingpynskhem ïa ki dkhot ka VDP Nongsohphoh la ïadonlang ruh u Vivekanand Singh Rathore, IPS, DIG (Eastern Range), u Bah Francis Kharshïing Mission Director jong ka DREAM Mission, u Bah Vivek Syiem, MPS, Superintendent of Police, ka Kong Dahunshisha Lyngdoh, MCS, Assistant Commissioner, u Bah Hardy Ryntathiang, Rangbah Shnong jong ka Shnong Nongsohphoh, ki ophisar bad ki dkhot ka Anti-Narcotics Task Force (ANTF), ki Rangbah Shnong jong ki shiphew Dorbar Shnong bad ki nongshong shnong.
