Shillong, Lber 16
Palat ïa ka 27 ne 28 ngut ki briew ki la shah kem noh ha kaba ïadei bad ka jingjia kaba dang shen kaba la jia ha rilum Garo.
Haba pyntip ïa kane ha ka sngi Nyngkong, u Symbud Myntri Rangbah ka Jylla ba khmih ïa ka tnad Kam Pohïing Bah Prestone Tynsong u la ong, “Ym duna ïa ka 27-28 ngut la dep kem haduh mynta.”
“Mynta lada phi dang kylli shuh shuh na nga halor kane, ngan ong ba ai ba ki pulit kin ïaid shakhmat bad ka jingtohkit bniah ka jong ki. Ïa mynta ngan nym lah ban ong. Ki lah ban don shuh shuh ki ban dang shah kem,” u la ong.
“Ngi ieh ha ki pulit ba peit ba kum kine ki jingjia kim dei shuh ban dang jia ha ki por ban dang wan,” la ong u Bah Prestone bad bynrap ba ka jingpeit bniah ka la long ruh shabar jong ka West Garo Hills.
“Kam dei eh thik tang ha West Garo Hills. Ka dei ban long ha ka thaiñ baroh kawei. Lehse naduh nangne hynrei ai ba ka jingtohkit kan ïaid shwa shakhmat. Ngi ngin leit shaduh ka bynta kaba kut jong katei ka mat,” u la ong.
U Symbud Myntri Rangbah u la pynthikna ruh ba ka Sorkar ka dang khmih bniah ïa ki ejahar kaba la kynthup ïa ka kyrteng jong u MLA barim u Esmatur Mominin bad u la kyntait ban kren eiei halor ka jingshah kem jong u MDC barim u Sofiur Rahman katba ka jingtohkit ka dang ïaid shakhmat.
Katkum ka jingpynpaw u Bah Prestone, ki hukum pynjari korphiw kin ïai neh tang shu la kem dum, katba ki bor Sorkar kin dang khmih bniah lano ban weng noh ïa ka korphiw.
“Kumba long mynta ka korphiw kan ïai bteng ban treikam ha ka por mynmiet bad ha kajuh ka por ngin sa peit haduh katno kloi ngin lah ban weng noh ïa ka jingpynjari ïa ka korphiw bad kumjuh ban weng noh ïa ka jingkhang khyrdep ban pyndonkam ïa ka kor internet,” la ong u Bah Prestone.
