Shillong, Lber 16
U Bah Roykupar Synrem, Chairman ka Confederation of Meghalaya Social Organization (CoMSO) bad uba dei u President ka Hynñiewtrep Youths’ Council (HYC) u la ong ba kum ka seng hi ka la jlep ban ïohi ïa ki nia kular bad jler ka Sorkar MDA kaba la lamkhmat da ka National People’s Party (NPP) mynta la phra snem bad ong ba ka la dei ka por ban pyni da ki kam.
Haba kynthoh ïa ka jingkren u Conrad K Sangma, Myntri Rangbah ka Jylla uba la ong ba ka Sorkar kan shimkhia bad ka NPP kan weng ïa ka jingïakynduh jingeh bad ki Syrnod Schedule Tribe ki riewlum Garo, u Bah Roykupar u la ong ba ka NPP phra snem ka la lamkhmat ïa ka Sorkar bad lamkhmat ruh ha Garo Hills Autonomous District Council hynrei ki leh aiu baroh shi katta?
U la ong ba ka jingïakynad um-snam ha Rilum Garo kan nym jia lada ka NPP ka shim khia ïa ka jingsngew ki riewlum Garo ba ym dei ban ai lad ïa ki bym dei riewlum ban ïoh shim bynta ne ïakhun ha ka ilekshon MDC sha GHADC.
“Ki riewlum Garo lane ki Achik ki la ngiah la kdang ïa ka Sorkar bad NPP bad lada ki sngewdon ka mon ban ïada ïa ka riti dustur, ka hok bad khyndew ki Achik kumta ka dei ban pyni da ki kam ym shuh ban jler,” u la ong. U la bynrap da kaba ong “Jin lada ka Sorkar ka shimkhia ban peit ïa ka Executive Committee ha GHADC kam shym la jia haduh ba la mih u pud ka jingïakulmar bad ka jingïa umsnam, ka jingshah pynjot bad ka jingshong syier ha katei ka thaiñ”. Kumta u la ong ba ka CoMSO ka pynrem jur ïa kane ka jingkheiñ sting ka Sorkar Jylla kaba la ïalam da ka NPP. “Ban shu pynpaw tang da ka ktien ban ong ba ka NPP lane ka Sorkar kan sa pynbeit ïa kane ka jingbakla bad ban pynïoh ïa ka jingthrang ki riewlum na Garo, ki dei tang ki kyntien ki ban shu pynthame bad pynbiej ïa ki nongshong shnong bad ki trai ri trai muluk kiba don ha Garo Hills,” u la ong.
“Ngi la thait bad shu sngap ïa ka jingjler ka Sorkar hynrei ka la dei ka por ba ka Sorkar hapoh ka jingïalam ka NPP ba kan pyni da ki kam. Lada kane ka Sorkar ka burom shisha ïa ka jinglong ba kyrpang jong ki trai ri trai muluk kiba la ai bor ha ki Autonomous District Council, ki dei ban pyni noh da ka kam ym ban shu pynbiej tang da ki kyntien ban sa leh,” la bynrap u Bah Roykupar Synrem.
U la ong ba ka CoMSO ka kren da kaba shai ba kan poi ka por ba lada kine ki nongïalam ki shu mlien ban pynbiej tang da ki kyntien, ka jingïai shah jong ki trai ri trai muluk kan kut ban pyni da ka bor bad ban pyni ba ka khyndew ka shyiap ka dei ban long trai da ki riewlum kiba dei hok.
