Nongstoiñ, Lber 16
Ka jingpynslem jong ka Sorkar Jylla ban pyndep noh ïa ka jingpynbeit ïa u pud u sam hapdeng ka Jylla Assam bad Meghalaya, kala pynlong ïa ka Federation of Khasi Jaiñtia and Garo People (FKJGP) West Khasi Hills District ba kan mih shakhmat ban pynpaw ïa ka jingdawa bad pynbor ba ka Sorkar ka dei ban shimkhia ban pynbeit noh ïa u pud u sam. Ha ka rally ba la pynlong ha ka sngi Nyngkong, da ki spah ngut ki dkhot ka FKJGP na ki unit bapher bapher jong ka West Khasi Hills ryngkat lang ki nongïalam ka FKJGP Sengkmie, nongïalam ka FKJGP WKH lem ki nongïalam na kiwei ki district, ki nongïalam ka Khasi Students’ Union West Khasi Hills, ki nongïalam ka Synjuk ki Rangbah Shnong Nongmynsaw Syiemship ki la ïa shimbynta ha ka jingïaid paidbah (rally) kum ka dak ban pynpaw ïa ka jingpyrshah bad dawa ïa ka Sorkar Jylla ban pynbeit ïa u pud u sam ym ban shu kut tang ban pynbiej ha ka por ilekshon. Ïa kane ka rally la sdang na ophis jong ka seng kaba don ha Upper New Nongstoiñ ter ter sha ïew Nongstoiñ bad pynkut da ka jingïalang ha market complex, New Nongstoiñ. U President ka FKJGP Sengkmie Bah Dundee Cliff Khongsit haba kren ha kane ka sngi u la ong, ha ki nongïalam bad ki dkhot ka FKJGP, ka jaidbynriew ka dei ka dkhot met bad lada ki paradoh parasnam ha ki thaiñ khappud ki ïakynduh ïa ka jingeh, ka pang ka mynsiem. U Bah Dundee u la ong ruh ba man la ki seng saiñpyrthei ki buh ha ka ‘manifesto’ ïa ka mat jong u pud u sam hynrei ïohi pat ba ka dei tang ka mat ïalap ha ka por ilekshon namar tang la dep ka ilekshon bad tang la dep ka ñiew vote, ki la klet noh ïa kata ka mat, kumta u la kyntu ïa ki dkhot ka seng bad ïa ki paidbah ba kin nang ai ka jingkyrshan ïa ka seng, lada ka seng ka donkam ha ki jingïakhih kiba tyngeh. Katba u Bah Eldie Newton Lyngdoh, General Secretary ka FKJGP Sengkmie u la ong, kum ka seng ka dap da ka mynsiem kaba sngewsih namar ka jingbym leh eiei jong ka Sorkar khamtam ban pyndep noh ban ïa pynbeit ïa u pud u sam jong ki shnong khappud kiba dang sahteng.
U la ong ruh ba ka jingleh donbor jong ka Assam kam dei shuh kaba dang thymmai bad ka jingsdang thombor ka Assam kala sdang naduh u snem 1951 bad dei ha kane ka snem ba ka jaidbynriew Khasi Pnar ka iam briew namar ha kane ka snem lyngba ka shithi lane ka Notification jong ka Sorkar Assam, kala knieh jubor ïa ki jaka ha Labang Nongphyllut Daloship Block 1, ka Raid Nongtung Thangwang Block 2 ban ai ïa ki sha ka United Kachar bad Mikir Hills kaba tip mynta kum ka Karbi Anglong.
U Bah Franklin Roy Syiemiong, General Secretary ka KSU WKHD u la pynpaw da kaba ong, “Ngim kwah satia ba ngin long tang ki nongtong um, ki nongthoh dieng jongno re jongno bad lyngba kane ka sngi kan pynkynmaw ïa ngi ba ngin nym hun satia tang ban shu shongsuk ban biang u saipan shimet.” Shuh shuh u la ong ruh ba ha kine ki sngi la i kumba ka jingkitkhlieh bad ka jingïatip lem ïa ka imlang sahlang kala nang jah kumba nangjah ki pud ki sam bad kumba sakma ki maw pud maw sam.
U la ong ruh ba ki longshwa kila aiti met bad mynsiem bad jaw snam ruh na ka bynta ka bha ka miat jong ka pateng kaba mynta bad hato kaei pat kaba kane ka pateng, ka dei ban leh na ka bynta ka bha ka miat jong ki pateng ban dang wan. U la ong ruh ba na ka liang jong ka KSU kumba kala ïadon ryngkat bad ka FKJGP ha ki por bala leit kan dang ïai bteng ban ïadon ryngkat na ka bynta ka bha ka miat jong ka ri bad ka jaidbynriew.
