Shillong, Lber 16
Ki bor distrik ka West Garo Hills ki la pynjlan ïa ka korphiw kaba la treikam lypa sha ka 6 baje mynstep jong ka 18 tarik u Lber, da kaba ailad pat ïa ka leit ka wan ha ka por mynsngi, kata ha ka 17 tarik u Lber – ban ailad ïa ki nongshong shnong ban leit sha ki jingdonkam jong ki, katkum ka hukum ba la pynmih da u District Magistrate, u Vibhor Aggarwal.
“…hadien ba la bishar bniah ïa ka jinglong-jingman bad ki kaiphod ba la ïoh pdiang na ki bor pynïaid aiñ, nga sngewhun ba ka jingbteng ïa ki lad jingïada kiba pyrkhing ka long kaba donkam ban wanrah biang ïa ka jinglong-jingman kumba ju long bad ban khanglad na ka jingjur shuh-shuh jong ka jingkulmar,” ong u Aggarwal ha ka jingpynmih hukum katkum ka kyndon 163 jong ka BNSS ha ka Lah Sngi U Blei.
Kane ka korphiw kan treikam naduh ka por 6 baje janmiet jong ka 17 tarik u Lber haduh ka por 6 baje mynstep ha ka sngi kaba bud.
“Ha ka por jong ka korphiw, ym dei ban mih shabar jong ka jaka sah bad ban don hapoh u pud u sam jong ka West Garo Hills District,” la ong ka hukum.
Hynrei ki bor distrik kin pynjynsur ïa ki jingpyrkhing hapdeng ka por 6 baje mynstep bad 6 baje janmiet ha ka 17 tarik u Lber na ka bynta ka jingïaid paidbah bad ki kam ba man ka sngi; ki skul, ki ophis, ki ‘bank’ bad kiwei-kiwei ki jaka ki lah ban treikam kumba ju long ha kine ki kynta.
Ha kajuh ka por, ki bor distrik ki la maham ba ki jingpynkheiñ aiñ kin khring ïa ka jingpynshitom katkum ka kyndon 223 jong ka BNS.
