Shillong, Lber 16
U Dhormonath Ch. Sangma, ha ka Lah Sngi U Blei u la shimti kum u Chief Executive Member (CEM) jong ka Garo Hills Autonomous District Council (GHADC), bad ïa u la kyrshan da 21 ngut ki MDC, hadien ba u Albinush R. Marak, u la iehnoh kam katto-katne minit hashuwa ban pynlong ïa ka jingtynjuh bor lyngba ka ‘No-Confidence’ kaba la buh ban pynlong ha kane ka sngi.
U Dhormonath, MDC na Naguapara, u la shimti ïa ka shuki ha ka sngi ba ka Kynhun Myntri ka la pynjlan ïa ka samoi treikam jong ka Council sha ka 18 tarik u Risaw ban ailad ha ka ban ïamir jingmut halor ki kyndon ïakhun na bynta ki kyrtong.
Kumban shu kdew hangne, la pynkynriah noh ïa ka ilekshon sha ka Council namar ka jinglong-jingman ka shong suk shong shngaiñ ha Ri-lum Garo.
Ka jingpynbna ba la pynmih da u CEM barim, u Albinush Marak ban pynlong kongsan ïa ka syrnot ST ban thep kyrteng, la tynjuh ha ‘High Court’, kaba hadien kata, ka la pyndam noh ïa katei ka hukum. Hadien kane, katto-katne ki kynhun ha katei ka thaiñ ki la pynlong ïa ki jingïakhih.
Kum ka jubab, ka Sorkar ka la rai ban pynkynriah noh ïa ka ilekshon bad plie lynti ban pyndep ïa ka jingpynïaid kam halor ki jingdawa ba la buh da ki paidbah.
Ki MDC na ka Liang Synshar bad Liang Pyrshah ki la ïawan lang ha ryngkat ka ‘agenda’ kaba ïasam lang na ka bynta ka jingmyntoi jong ki paidbah.
Ki don 21 ngut ki MDC kiba la phah jingthoh sha u Lat ka Jylla, u C.H. Vijayashankar ha Shillong ban pan jingbit bad ban rah ïa kane ka ‘Motion’; la khot ïa ka Dorbar Kyrpang, hynrei u Marak u la hiar shuki noh shuwa ban ïatynjuh hapoh Ïingdorbar.
Hadien kane, la jied ïa u Dhormonath Ch. Sangma kum u CEM ha ryngkat ka jingkyrshan jong 21 ngut ki MDC.
Nalor u CEM, kane ka ‘Executive Committee’ bathymmai ka kynthup ruh ïa u Sanjay Koch, Stevie M. Marak, Linekar K. Sangma, Grahambell A. Sangma, Anseng A. Sangma, Henen R. Sangma, Ashahel D. Shira, Rakesh A. Sangma, Promod Koch, Arbinstone B. Marak, Sengchim N. Sangma, Sengbath R. Marak, Nehru D. Sangma, Crozier G. Momin, Aldo A. Sangma, Cherack W. Momin, Rinaldo K. Sangma, Perdinand D. Shira, Aphonsius R. Marak bad Agasi R. Marak.
Hashuwa, ha ka shithi jong u sha u Chairman ka GHADC, u CEM barim, u Albinush R. Marak u la ong ba u hiar shuki mardor “halor ki rai kiba shong nongrim” bad un ym bteng “ha ka kyrdan ha kaba kiba bun paid jong ki dkhot kim ai shuh ïa ka jingshaniah jong ki ha ka jinglong nongïalam jong nga.”
U la ong ba ka ‘Executive Committee’ hapoh ka jingïalam jong u ka la buddien ïa ki kyndon bad ki lad ki lynti ban ïada ïa ki hok bad ki riti-dustur jong ka Ri-lum Garo, watla “ki katto-katne ki jinglong-jingman ki la khanglad” ïa katto-katne ki sienjam ban pyntreikam pura.
“Ha ka shlem synshar paidbah, ka jingkyrmen skhem jong kiba bun…ka long kaba donkam na ka bynta ka jingtreikam kaba biang jong ka ‘Executive Committee’,” u la thoh bad bynrap ba ka jingaiti jong u sha ka jingshakri paidbah “kan dang ïaineh” bad kam shong ha ka jingbat kyrdan ïa ka kam.
