Guwahati, Lber:
U President ka seng Congress ha Assam u Gaurav Gogoi, ha ka sngi U Blei, u la pynpaw ïa ka jingshaniah ba ki nongthep vote kin weng noh ïa ka sorkar ba la ïalam da ka BJP ha ka ilekshon sha ka ïingdorbar thawaiñ ban wan, da kaba pynskhem ba ka sorkar Congress kan thaw ïa ka “Assam kaba thymmai”.
Haba kynthoh ïa ka jingpynbna ïa ka por ilekshon da ka Election Commission of India, u Gogoi u la ong ba ki paidbah ka jylla ki long kiba la khreh na ka bynta ka jingkylla bad kin wanrah ïa ka sorkar ba la ïalam da ka Congress ha ka bor synshar da ka jingbun paid kaba pura.
“La pynbna ïa ka ilekshon sha ka ïing dorbar thawaiñ ha Assam, bad nga don ka jingkyrmen kaba pura ba ki paidbah ka Assam kin wanrah ïa ka sorkar ba ïalam da ka Congress da ka jingbun paid kaba pura… bad kan thaw ïa ka Assam kaba thymmai”, la ong u Gogoi haba kren sha ki lad pathai khubor. U la bynrap ruh ba kum kane ka sorkar kan pynthikna ïa ka roi ka par bad kan ailad ïa ki nongshong shnong ban im suk im saiñ “katkum ka hok tynrai jong ngi”.
Kum ka jingthalaiñ ïa u Myntri Rangbah ka Jylla u Himanta Biswa Sarma, u Gogoi u la kynnoh ïa ka jingsynshar kaba mynta ba ka don ka jingbamsap bad ong ba ki nongthep vote kin kyntait ïa ka ha synduk thep vote. “Ki paidbah ka Assam kin rat dyngkhong bad bret noh ïa ka sorkar bamsap jong u Himanta Biswa Sarma”, u la ong.
Ka Election Commission ka la pynbna ha kane ka sngi Saitjaiñ ba ka jingthep vote na ka bynta baroh 126 tylli ki Assembly konstitwensi ha Assam kan long ha kawei ka bynta ha ka 9 tarik, Ïaïong, katba ka jingñiew ïa ki vote la buh ban long ha ka 4 tarik u Jymmang. Ka Model Code of Conduct ka la treikam mardor hadien katei ka jingpynbna.
Ha kane ka ilekshon ban wan la khmih lynti ba kan don ka jingïakhun beit beit hapdeng ka National Democratic Alliance (NDA) kaba don ha ka liang synshar kaba la ïalam da ka BJP bad ka liangpyrshah kaba la ïalam da ka Congress. Ka BJP, hapoh ka jingsynshar jong u Myntri Rangbah ka Jylla, u Himanta Biswa Sarma, ka dang thmu ban bat ïa ka shuki ha ka sien kaba lai lynter, katba ka Congress, ka dang pyrshang ban ïoh biang ïa ka bor synshar ha kane ka Jylla.
Hashwa ka jingthep vote, ka BJP ka la pynlong ïa ka Jan Ashirwad Yatra jong ka, kaba dei ka jingïalap paidbah kaba thmu ban ïakynduh bad ki nongthep vote ha kylleng ka jylla. U Sarma uba ïashim bynta shitrhem ha kane ka prokram, u la ïathuh ha ka bynta ba nyngkong ba u la ïaid kumba 1,200 kilomitar bad u la pynlut haduh 14 kynta man ka sngi ban ïakynduh bad ki paidbah.
Ha kajuh ka por, ka Congress, ka la pynmih ïa ka thup kyrteng kaba ar jong ki kyrtong na ka bynta kane ka ilekshon, ha kaba ka la pynbna ïa ki 23 tylli ki kyrteng bad ka jingdon jong ki kyrtong kiba la pynbna haduh mynta ka long 65 ngut na ki 126 tylli ki seat. Ka seng ka la iehnoh haduh 15 tylli ki konstitwensi na ka bynta ki seng ba la ïatreilang, kynthup ïa ka Bhowanipur-Sorbhoog, Bajali, Palasbari, Guwahati Central, Goreswar, Morigaon bad Barhampur.
Ka kynhun NDA ka la ïoh ïa ka jingjop kaba suk ha ka ilekshon sha ka ïingdorbar thawaiñ jong u snem 2021, da kaba jop 75 tylli ki seat. Ka BJP ka la paw kum ka kynhun synrop kaba heh tam ha katei ka jingïateh lok da kaba ïoh 60 tylli ki seat, ryngkat bad ka Asom Gana Parishad (AGP) bad ka United People’s Party Liberal (UPPL). Ki nongthep vote ki la poi sha ka 86.2 per cent, ha kaba palat 2.2 klur ngut ki nongthep vote kiba la pynrung kyrteng kiba la ïashim bynta.
Ha ka ilekshon sha ka ïingdorbar thawaiñ jong u snem 2016, ka BJP ruh ka la jop 60 tylli ki seat, katba ka Congress ka ïoh 26 tylli ki seat bad ka AIUDF ka la jop 13 tylli. Ka jingwan thep vote jong ki nongthep vote ka long haduh 83.9 percent, ha kaba lajan 1.99 klur ki nongthep vote ki la ïashim bynta ha kylleng ki 126 tylli ki konstitwensi.
