Guwahati, Lber:
Kum ka jingjia kaba ktah ïa ka saiñ pyrthei khamtam hashwa ka ilekshon Assembly ha Assam ka ban sa long, u heh nongïalam jong ka seng Congress bad u MP ka Lok Sabha u Pradyut Bordoloi u la iehnoh ïa ka kam na ka Indian National Congress, kaba la pynmih ïa ki dak ki ki shin kiba pyntikna ba un sa lah ban leit pynïasoh bad ka seng Bharatiya Janata Party (BJP) bad ban ïakhun ïa ka ilekshon sha ka ïingdorbar thawaiñ ka jylla na ka Dispur konstitwensi.
Kane ka jingjia ka long hadien ba u Myntri Rangbah ka Jylla Assam u Himanta Biswa Sarma u la khot ïa u Bordoloi ban rung sha ka seng BJP. Haba kren ha ki nongthoh khubor kham mynshwa, u Sarma u la ong ba wat la um shym la ïakynduh dalade ïa utei u nongïalam ka Congress, hynrei u ngeit ba u Bordoloi u lah ban ym long uba donkam ban neh ha ka Congress.
“Ngam shym la ïakynduh ïa u Pradyut Bordoloi, hynrei nga ngeit ba um don ïa ka jingbthah ban sah biang ha ka Congress. Nga ai jingmut ïa u ba un rung sha ka BJP, bad nga pdiang sngewbha ïa u sha ka seng. Haduh mynta, kam pat don kano kano ka jingïakynduh bad u”, la ong u Sarma.
U Myntri Rangbah u la kdew ruh ba ka BJP kan ai ka jingburom ïa u Bordoloi kaba ïasyriem kumba ka la ai ïa u heh nongïalam jong ka Assam u Bhupen Kumar Borah.
“Ka rukom ba ngi ai burom ïa u Bhupen Borah, ha kajuh ka rukom ngin ai burom ïa u Pradyut Bordoloi,” u Sarma u la ong bad bynrap ba ka seng kan pynthikna ba u Bordoloi un ïoh ïa ka lad ban ïakhun ïa ka ilekshon sha ka ïingdorbar thawaiñ lada u rung sha ka BJP.
“Lada u Pradyut Bordoloi un rung sha ka BJP, ngin pynthikna ba un ïakhun ïa ka ilekshon sha ka ïingdorbar thawaiñ bad ngin pyllait ïa ka shuki na ka bynta jong u”, la pynpaw u Myntri Rangbah ka Jylla.
Ka jingiehnoh jong u Bordoloi na ka Congress mynta ka la pynjur ïa ka jingkynthoh halor ka jingwan rung shen jong u sha ka BJP bad ka jinglah ban mih madan na ka shuki Dispur, kawei na ki konstitwensi kaba don jingmut bha ha ka saiñ hima sima ha Assam.
Ha kajuh ka por, da kaba bynrap sa kawei pat ka bynta jong ki jingjia ha ka saiñ hima sima, la khmih lynti ba u khun jong u Bordoloi, u Prateek Bordoloi un ïakhun ïa ka ilekshon sha ka ïingdorbar thawaiñ ban wan da ka tiket Congress na Margherita konstitwensi.
Ki tyllong khubor ki ngeit ba kane ka jingleh jong u Bordoloi ka lah ban pynmih ïa ka jingpynkylla kaba khraw ha ka saiñ hima sima jong ka Assam shwa ka ilekshon sha ka Ïingdorbar Thawaiñ, kaba lah ban wanrah ïa ka jingshah ktah kaba khraw ïa ka kynhun pyrshah.
