Washington, Iaiong:
U President ka United States, u Donald Trump, ha kane ka kynti u la maham tyngeh ïa ka Iran ba ka dei ban plie beit noh ïa ka lynti ïaid jhad na ka duriaw ‘Strait of Hormuz’. Lym kumta, la ong ba ka US kan leh da ka bor bad kan ai jingsneng ïa ka Iran ha ka rukom kaba dei bad u Trump u la ai por ruh ï ka Iran ba ka dei ban jubab bad leh eiei noh halor kane, tang hapoh jong ka jan miet Sngi Ba-ar. U Trump u la kren ïa kane, hapdeng ka jingai jingkren jong u sha ki lad pathai khubor jong ka Wall Street Journal, kaba la pyllait paidbah ha ka Sngi U Blei.
Ha katei ka jingkren jong u, u Trump u la byrngem tyngeh ïa ka Iran bad ong ba, lada ka Iran kam lah ban leh ïa kaei kaba ka US ka la dawa, ka Iran kan hap ban mad ïa ka jingbitar jong ka US bad kan duh lut noh syndon ïa baroh ki shlem bor ding, ki shlem nuclear bad baroh ki kam- ki jam bad ki jingkyrshan jong ka ioh- ka kot jongka, kin sa khyllem lut plaiñ.Dang shen ha katei hi ka Sngi U Blei, u Trump u la ong ba lada ka Iran ka kyntait ne leh bym suitñiew ïa ki jingdawa bad jingbthah jong ka US, ka US kan ther bad pynjulor ïa ki shlem treikam bad ki karkhana ba kongsan jong ka Iran. Namarkata, u la ong ba hashwa ba kita baroh kin jia, ka US ka la ai por ia ka Iran ba kan shim ia ka rai ba pura bad ba kan leh ia kaei kaba ka US ka la dep pynshai, hapoh jong katei ka jan miet Sngi Ba-ar ba la ai por da ka US.
