Tehran, Iaiong:
U Nongïalam ba ha khlieh duh jong ka Iran, u Mojtaba Khamenei, ula ong ba ka Iran, kan dang ïai bteng ban kyrshan ïa ka jingïakhun pyrshah ïa ka Israel bad ïa ka US, da kaba bud ïa ka lynti jong u nongïalam ba ha khlieh duh ba nyngkong, Imam Khomeini bad u kpa jong u, U Ali Khamenei.
Ha ka khubor sha u Sheikh Naim Qassem jong ka Hezbollah, U Khamenei u la ïaroh ïa ka “jingsngew, ka jingieit bad ka jinglong shitrhem” ba la pyni da ki nongialehkai Hezbollah.
Da kaba iaroh ia u Naim Qassem, u la thoh, “Da kaba ai ia kaei kaba nga tip shaphang jong phi, nga kyrmen ba phin pynthut ia ki jingthmu jong u nongshun na Zion bad sa shisien phin wanrah ia ka jingsma jong ka burom sha ki briew baieit jong ka Lebanon.”
U Khamenei um shym la iohi shuh naduh ba la sdang ka thma ha ka 28 tarik u Rymphang. Ki heh jong ka US bad Israel ki ngeit ba u la mynsaw bad u buhrieh ialade ha ka jaka kaba shngain.
U la pynmih katto katne ki jingkren paidbah naduh katei ka por, kiba la pule ha ki telebishon jong ka ri. Hynrei ka jingbym don jong u na khmat ki paidbah ka la pynmih ia ki khubor lamler shaphang ka koit ka khiah bad ka jaka sah jong u.
Haba pynsangeh ïa ki jingkheiñ jingdiah, uwei u nongmihkhmat jong ka Russia u la ong ba u Mojtaba Khamenei u don ha Iran hi.
U nongmihkhmat ba ha khlieh duh jong ka Ri, u Mojtaba Khamenei, u don ha katei ka ri, hynrei u la kiar na kaba mih paidbah “na ki daw kiba lah ban sngewthuh”, la ong u nongmihkhmat jong ka Russia ha Iran, u Alexey Dedov, ha ka lad pathai khubor RTVI.
Haduh sawphew snem, une u lyngdoh niam uba la 56 snem ka rta u la treikam kham bun ha lyndet ha ka por ba synshar u kpa jong u, u la don ka bor hynrei um ju paw ha ki jaka paidbah. Mynta la pynrung ia u ha ka kyrdan kaba donbor tam ha Iran, ka jingbym lah ban iohi jong u kaba dang iai bteng, katkum ka jingong ki nongthoh khubor, ka pynpaw ia ka jingkylla jong ka bor ha ka ri Islamic, ha kaba ki jaka treikam bad ki bor pahara ki lah ban kham kongsan ban ia u briew shimet uba don ha khlieh duh.
