Rio Grande Do Sul, Iaiong:
Ha kane ka khubor, la ïathuh ba 4 ngut ki la duh noh ïa ka jingim jong ki hadien ba kawei ka liengsuiñ rit ka la leit hap bakla ha kawei ka jaka bam kaba don ha ka phang sepngi jong ka nongbah Rio Grande Do Sul jong ka Ri Brazil. Ki briew ka kynhun pynlip ding ki la pyntip ba u nongñiah jong katei ka liengsuiñ bad 3 ngut ki nongshong hapoh jong katei ka liengsuiñ, ki la khlad noh ha katei ka jingjia, kaba la jia ha ka por kumba 10:30 mynstep. Kitei kiba khlad ki kynthup ïa ki shijur kiba dang leit jingleit da katei ka liengsuiñ na Sao Paulo.
La ong ba katei ka liengsuiñ ka la leit hap noh katba ka dang thmu ban leit hiar sha ka Kad Liengsuiñ Capao da Canoa, ha kaba, ka la kum leit tyngkhuh ïa uwei u dieng pos ilektrik uba don hajan jong katei ka jaka hiar liengsuiñ hashwa ba kan leit tur beit-beit syndon sha katei ka jaka bam kaba don ha katei ka jaka ba sah briew.
Hynrei namar ba katei ka jaka bam, kam shym la plie ha katei ka por ba kane ka la jia, kumta ym shym la don ba mynsaw na ka liang katei ka jaka bam.
Ha ki video bad ki dur ba la pynsaphriang ha ki rynsan ‘social media’ la ïohi ïa ki thylliej ding kiba klang shalor ka tnum jong katei ka jaka bam, ha kaba la ïohi ïa ka tdem kaba rben bha kaba kiew shalor suiñ na katei ka jaka. Katkum ka khubor jong ka The Metro, ki paidbah kiba sah hajan ka jaka ba la shah pynkynriah noh da ki kynhun jong ka Civil Defence tang hadien ba la jia katei ka jingjia.
Ki heh ka thaiñ, ki la pynthikna ba kawei ka dukan kaba don hajan, kaba la khang ruh, ka la shah pynjulor.
U Lat ka jylla Rio Grande do Sul, u Eduardo Leite, u la ong ba u la buddien ïa kane ka jinglong jingman naduh kaba sdang bad ba baroh ki bor pahara ki la pynbiang pura kum ka jingpynkhreh.
Ka nongaiktien jong ka tnat Civil Defence, ka Sabrina Rimas, ka la pynthikna ba ïa ki jaka ba marjan la pynkynriah noh kloi bad khlem kano kano ka jingmynsaw. Ka la bynrap ba ki nongpynlip ding bad ki shipai ki la poi mardor ban ïakhun pyrshah ïa ka jingpluh bad ban pynskhem ïa ki jaka ba marjan.
Katei ka jinghap, ka la jia tang hapoh 24 kynta, hadien ka jinghap jong ka liengsuiñ kaba rit, kaba kyrpang hajan ka nongbah Puebla, kaba don ha pdeng jong ka Mexico, ha kaba saw ngut ki briew ruh, ki la duh noh ïa la ka jong ka jingim.
